बारबर्दिया
बारबर्दिया नगरपालिकामा यही माघ २२ देखि फागुन ६ गतेसम्म एचपीभी (ह्युमन प्यापिलोमा भाइरस) खोप अभियान सञ्चालन गरिने भएको छ। पाठेघरको मुखको क्यान्सरविरुद्ध खोप प्रदान गर्नको लागि सञ्चालन गर्न लागिएको यो अभियानको जानकारी स्वास्थ्य शाखा प्रमुख गोविन्द पौडेलले दिनुभएको हो।
पौडेलका अनुसार खोप पूर्ण रूपमा सुरक्षित रहेको र यो निःशुल्क रूपमा प्रदान गरिनेछ। अभियानलाई प्रभावकारी बनाउन माघ ११ गते नगरकार्यपालिकाको हलमा नगर खोप समन्वय समितिका पदाधिकारीहरू, सञ्चारकर्मीहरू, र सरोकारवालाहरूबीच अभिमुखीकरण तथा अन्तरक्रिया कार्यक्रम सम्पन्न भएको छ।
यस अभियानले विद्यालयमा अध्ययनरत कक्षा ६ देखि १० सम्मका छात्राहरू र विद्यालयमा नजाने १० देखि १४ वर्ष उमेरका किशोरीहरूलाई लक्षित गरेको छ। स्वास्थ्य संस्थाले विद्यालयसँग समन्वय गरी खोप केन्द्र सञ्चालन गर्नेछ। विद्यालय नजाने किशोरीहरूलाई नजिकको स्वास्थ्य संस्थामा गएर खोप लगाउन उत्प्रेरित गरिने पौडेलले बताउनुभयो।
पाठेघरको मुखको क्यान्सरको मुख्य कारण ह्युमन प्यापिलोमा भाइरस हो। पटक–पटकको संक्रमणले यो रोग उत्पन्न हुन सक्ने भएकाले खोपको महत्त्व झनै बढेको छ। खोप लगाएपछि सामान्य रूपमा सुई लगाएको ठाउँ दुख्ने, हल्का ज्वरो आउने वा थकान महसुस हुने जस्ता समस्या देखिन सक्छन्, तर यस्ता समस्या केही समयमै ठीक हुने बताइएको छ।
स्वास्थ्य शाखा प्रमुख पौडेलले एचपीभी खोप अभियानलाई सफल बनाउन सबै सरोकारवालाहरूलाई आ–आफ्नो ठाउँबाट सहयोग गर्न आग्रह गर्नुभएको छ। उहाँले खोप अभियानमार्फत पाठेघरको मुखको क्यान्सरबाट बच्न सकिने र यो खोपले जीवन रक्षा गर्नेमा विश्वास व्यक्त गर्नुभएको छ।
