होमेन्द्र थापा, बर्दिया
चाडपर्व नजिकिँदै गर्दा यात्रुहरूको सहज र सुरक्षित यात्राका लागि बर्दियाका पाँच स्थानमा यात्रु सहायता कक्ष सञ्चालनमा ल्याइएको छ । चाडपर्वका बेला यात्रुले भोग्नुपर्ने समस्या समाधान गर्ने, यातायात सेवालाई व्यवस्थित बनाउने र सम्भावित सवारी दुर्घटना न्यूनीकरण गर्ने उद्देश्यले सहायता कक्ष स्थापना गरिएको हो ।
गुलरिया बसपार्कमा यात्रु सहायता कक्षको उद्घाटन गर्दै प्रमुख जिल्ला अधिकारी गोगन बहादुर हमालले यात्रुहरूको सहज यात्राका लागि सहायता कक्ष सञ्चालनमा ल्याइएको बताउनुभयो । प्रमुख जिल्ला अधिकारी हमालका अनुसार चाडपर्वका समयमा यात्रुहरूले कुनै पनि किसिमको असहजता भोग्न नपरोस् भन्ने उद्देश्यले सार्वजनिक सवारीसाधनको अनुगमन गरी आवश्यक सुविधा उपलब्ध गराइनेछ ।
बर्दियाको गुलरिया बसपार्क, सानोश्री बसपार्क, राजापुर बसपार्क, भुरीगाउँ बजार चोक र बाँसगढीको किसान चोकमा यात्रु सहायता कक्ष सञ्चालनमा ल्याइएको छ ।
जिल्ला ट्राफिक प्रहरी कार्यालय बर्दियाका प्रमुख सन्दीप बेलबासेले चाडपर्वका बेला हुन सक्ने सवारी दुर्घटना न्यूनीकरण गर्नुका साथै यातायात सञ्चालनलाई सहज र व्यवस्थित बनाउन सहायता कक्ष सञ्चालन गरिएको बताउनुभयो । उहाँले बर्दियाबाट अन्य जिल्ला जाने तथा जिल्लामा आउने यात्रुहरूलाई यात्राका क्रममा कुनै समस्या वा असहजता भएमा समयमै सहायता कक्षमा जानकारी गराउन आग्रह गर्नुभयो ।
यात्रु सहायता कक्षको सञ्चालनसँगै चाडपर्वका समयमा यात्रुहरूले भोग्नुपर्ने समस्या समाधान हुनुका साथै सुरक्षित र सहज यात्रामा सहयोग पुग्ने अपेक्षा गरिएको छ ।
