बर्दिया,
बारबर्दिया नगर अस्पतालमा रक्त सञ्चार (Blood Transfusion) सेवा आइतबारदेखि औपचारिक रूपमा सञ्चालनमा आएको छ। नगर प्रमुख छविलाल थारुले अस्पतालमा कार्यरत स्वास्थ्यकर्मी सरिता राजीलाई रगतको पोका हस्तान्तरण गर्दै सेवा शुभारम्भ गर्नुभएको हो।
यसअघि गत कात्तिक १३ गते मंगलबार रक्त सञ्चार केन्द्र स्थापना गरिएको थियो। बारबर्दिया नगरपालिका, रेडक्रस उपशाखा बारबर्दिया तथा अस्पतालको समन्वयमा केन्द्र स्थापना गरिएको हो। रगत सङ्कलन र आपूर्तिको पूर्वाधार तयार गर्दै सञ्चालनको तयारी गरिएसँगै हाल सेवा औपचारिक रूपमा सुरु भएको हो।
उक्त अवसरमा उद्यम विकास शाखा प्रमुख पार्वती गौडेलले बारबर्दिया–२, जोगीगाउँका थालेसिमियाका बिरामी विकास थारुलाई O+ रगत दान गर्नुभयो। सिकलसेल तथा थालेसिमियाबाट पीडित बिरामीका लागि यो सेवा महत्त्वपूर्ण हुने विश्वास लिइएको छ ।
नगर स्वास्थ्य शाखा प्रमुख गोविन्द पौडेल, अस्पताल व्यवस्थापन समितिका अध्यक्ष तिर्थराज पौडेल, अस्पताल प्रमुख डा. माधव पन्त, डा. सुधिर केसी, डा. जितेन्द्र यादव, तथा रक्तसञ्चार केन्द्रका प्राविधिक अंकक्ष चौधरी लगायतको सहकार्यमा सेवा सञ्चालनमा आएको हो।
बारबर्दिया सिकलसेल नगर समितिले यो कार्यलाई स्वास्थ्य क्षेत्रमा थपिएको महत्वपूर्ण उपलब्धीको रूपमा लिँदै सम्पूर्ण टिमलाई आभार व्यक्त गरेको छ। साथै, स्थानीय स्तरमै सुलभ र नियमित रक्त सेवा उपलब्ध होस् भन्ने शुभकामनासमेत व्यक्त गरिएको छ।
यस क्षेत्रमा सिकसेल तथा थालेसेमिया विरामीहरुको संख्या अन्य धेेरै रहेकोले सिकलसेल अस्पतालको आवश्यकता रहेको छ ।
