होमेन्द्र थापा, बर्दिया
बर्दियामा भूमिहीन दलित र सुकुम्बासीहरुलाई जग्गाधनी प्रमाणपत्र (लालपुर्जा) वितरण गरिएको छ। बाँसगढी नगरपालिका वडा नं. ४ का ३ जना दलित र १० जना सुकुम्बासी तथा गुलरिया नगरपालिका वडा नं. ४ का २९ जना दलित र ११ जना सुकुम्बासी गरी कुल ५३ जनालाई लालपुर्जा वितरण गरिएको हो।
भूमि समस्या समाधान जिल्ला समिति, बर्दियाका अध्यक्ष अरुण प्रकाश सिंह राठौरका अनुसार, "भूमिहीन दलित, सुकुम्बासी तथा अव्यवस्थित बसोबासीलाई जग्गा उपलब्ध गराउने कार्यविधि, २०८१" अनुसार प्रमाणपत्र वितरण गरिएको हो। बाँसगढी र गुलरिया नगरपालिका क्षेत्रका लाभग्राहीलाई वितरण गरिएको जग्गाको कित्ता संख्या ५५ रहेको छ भने कुल क्षेत्रफल २१,१५५.२१ वर्गमिटर छ।
गुलरिया नगरपालिका–४ कैलाशनगरका ८० वर्षीय गान्टो सुनारले आवासका लागि २०७.८९ वर्गमिटर क्षेत्रफलको लालपुर्जा पाउनु भएको छ। त्यस्तै, बाँसगढी नगरपालिका–४ पहाडीपुरका पुनबहादुर कुँवरले २०२६ सालदेखि भोगचलन गर्दै आएको जग्गाको लालपुर्जा प्राप्त गर्दा आफुले लामो संघर्षपछि न्याय पाएको महसुस भएको बताए।
भूमि समस्या समाधान आयोग, बर्दियाका विज्ञ सदस्य रामकृष्ण चौधरीले यो वितरणलाई आयोगको महत्वपूर्ण उपलब्धि बताएका छन्। उनका अनुसार जिल्लाभरबाट प्राप्त ४५ हजारभन्दा बढी निवेदनमध्ये प्रारम्भिक चरणमा ५३ जनालाई लालपुर्जा वितरण गरिएको हो। साथै, विगतका आयोगहरूले सुरु गरेर अधुरा छाडिएका कामलाई निरन्तरता दिँदै अघि बढिरहेको जानकारी समेत दिनुभयो।
