होमेन्द्र थापा, बर्दिया
१९औँ गणतन्त्र दिवसको अवसरमा आयोजित प्रथम बर्दिया जिल्ला कर्मचारी स्तरीय ब्याडमिन्टन प्रतियोगितामा राजापुर नगरपालिका प्रथम भएको छ । कर्मचारी मिलन केन्द्र बर्दियाको आयोजनामा सम्पन्न प्रतियोगितामा राजापुर नगरपालिकाका प्रमुख प्रशासकीय अधिकृत दशरथ बुढा र सुदीप सार्कीको टिम प्रथम भएको हो ।
प्रतियोगितामा स्वास्थ्य बिमा बोर्डका डेकेन्द्रबहादुर बिष्ट र राष्ट्रिय वाणिज्य बैंकका ठोक्रे बिष्टको टिम द्वितीय बनेको छ भने बबई सिँचाइ आयोजनाका रामनरेश थारु र बिकल चौधरी तथा सशस्त्र प्रहरी बलका कलम थापा र रामबहादुर सोमैको टिम संयुक्त रूपमा तृतीय भएका छन् ।
कर्मचारी मिलन केन्द्रका अध्यक्ष सूर्यबहादुर खत्रीका अनुसार जेठ १३ गतेदेखि सुरु भएको प्रतियोगितामा जिल्लाका विभिन्न कार्यालयका २८ टोलीको सहभागिता रहेको थियो ।
गणतन्त्र दिवसलाई भव्य रूपमा मनाउन संघ, प्रदेश, जिल्ला तथा पालिका तहमा विभिन्न कार्यक्रम आयोजना गरिएको प्रमुख जिल्ला अधिकारी गोगनबहादुर हमालले जानकारी दिनुभयो । उहाँका अनुसार प्रधानमन्त्रीको अध्यक्षतामा संघीय स्तरमा, मुख्यमन्त्रीको अध्यक्षतामा प्रदेश स्तरमा, प्रमुख जिल्ला अधिकारीको अध्यक्षतामा जिल्ला स्तरमा तथा नगर प्रमुखको अध्यक्षतामा पालिका स्तरमा समारोह समिति गठन गरी कार्यक्रम सञ्चालन गरिएको हो ।
गणतन्त्र दिवसको अवसरमा शुक्रबार बिहान गुलरियामा प्रभातफेरी कार्यक्रम पनि आयोजना गरिएको थियो । नेपाल प्रहरी, सशस्त्र प्रहरी, नेपाली सेना, निजामती कर्मचारी, राजनीतिक दल तथा विभिन्न संघसंस्थाका प्रतिनिधिहरूको सहभागिता रहेको प्रभातफेरी गणेशमान चोकबाट सुरु भई शहीद पार्कमा पुगेर शहीदहरूको प्रतिमामा माल्यार्पण गरिएको थियो । त्यसपछि तुलापुर चोक हुँदै कबडहलमा पुगेर ब्याडमिन्टन प्रतियोगिताका विजेताहरूलाई पुरस्कार वितरण गरिएको थियो ।
गणतन्त्र दिवसको अवसरमा जिल्लामा कर्मचारी स्तरीय ब्याडमिन्टन प्रतियोगिता, साँझ दीप प्रज्वलन, प्रभातफेरी तथा शहीदहरूप्रति सम्मान कार्यक्रमलगायत विविध कार्यक्रम आयोजना गरिएको आयोजकले जनाएको छ ।
