बर्दिया
बर्दियाकाे बारबर्दिया नगरपालिकाले प्रजनन् स्वास्थ्य र नसर्ने रोगको पहिचान तथा व्यवस्थापनका लागि निःशुल्क स्वास्थ्य शिविर सञ्चालन गरिरहेको छ। अब्स्टेट्रिक फिस्टुला, आँङ खस्ने समस्या, यौन रोग, स्तन क्यान्सर तथा पाठेघरको मुखको क्यान्सर पहिचान गर्न भिजुअल इन्स्पेक्सन विधि (VIA) द्वारा ३० वर्ष माथिका महिलाहरूको जाँच गरिँदै छ।
शिविर २३ फागुनदेखि चैत ४ गतेसम्म नगरपालिकाका विभिन्न सात वडामा सञ्चालन हुनेछ। आज वडा नं. ५ बाट सुरु भएको शिविर २४ गते वडा १, २५ गते वडा २, २६ गते वडा ११, २७ गते वडा ९, ३ चैतमा वडा ८ र ४ चैतमा वडा ७ मा सञ्चालन हुने स्वास्थ्य शाखा प्रमुख गोबिन्द पौडेलले जानकारी दिनु भएकाे छ । जाँचपछि रोगको शंका भएकालाई नगर अस्पतालमा स्त्रीरोग विशेषज्ञसँग परामर्श गराउने व्यवस्था गरिएको छ भने आवश्यक औषधि पनि निःशुल्क प्रदान गरिनेछ।
यसैबीच, फागुन महिनाभर नसर्ने रोगहरूको पहिचानका लागि एक महिने अभियान अन्तर्गत विभिन्न परीक्षणहरू भइरहेको छ। अहिलेसम्म ६ हजार ९सय ६५ जना व्यक्तिको स्वास्थ्य परीक्षण भइसकेको छ । पालिका भरी ११ हजार जनालाई जाँच गर्ने लक्ष्य राखिएको छ। मधुमेह, मिर्गौला सम्बन्धी रोग, रक्तचाप तथा बीएमआई मापन जस्ता परीक्षणहरू नगरपालिकाका १ देखि ११ वडासम्मका स्वास्थ्य संस्थामार्फत भइरहेको छ।
स्वास्थ्य शाखाले समुदायमा जानकारी फैलाउन आग्रह गर्दै नागरिकलाई शिविरमा सहभागी हुन अनुरोध गरेको छ।
