बारबर्दिया,
बारबर्दिया नगरपालिका–७, रम्मापुरमा आयोजित पाँचौँ नगरस्तरीय राष्ट्रपति रनिङ्ग शिल्ड खेलकुद प्रतियोगिताको आज सामाजिक विकासमन्त्री जन्मजय तिमिल्सिनाले उद्घाटन गर्नुभयो।
कार्यक्रमलाई सम्बोधन गर्दै मन्त्री तिमिल्सिनाले खेलकुद राष्ट्र र राष्ट्रियताको पहिचानसँग जोडिएको क्षेत्र भएको बताउनुभयो। उहाँले समुदायमा रहेका किसान, मजदुरलगायत भुईँतहका जनताको आवाज माथिसम्म पुर्याउने जिम्मेवारी जनप्रतिनिधिहरूको रहेको उल्लेख गर्दै आफु सधैं जनताको पक्षमा काम गर्न प्रतिबद्ध रहेको बताउनुभयो। “जनताले गरेको विश्वासलाई मैले कहिल्यै विश्वासघात गर्न सक्दिन, म जनताको सेवकका रूपमा काम गरिरहेको छु,” मन्त्री तिमिल्सिनाले भन्नुभयो।
उहाँले शिक्षा र खेलकुद क्षेत्र दुबैलाई प्राथमिकतामा राखेर अघि बढिरहेको बताउँदै खेलले अनुशासन, लगनशीलता र आत्मविश्वासको विकास गराउने उल्लेख गर्नुभयो। मन्त्री तिमिल्सिनाले खेलाडी विद्यार्थीहरूलाई सफलता, अनुशासन र मर्यादामा रहँदै देश र समुदायको नाम उज्यालो पार्न शुभकामना दिनुभयो।
कार्यक्रममा बारबर्दिया नगरपालिकाका प्रमुख छबिलाल थारुले विद्यालयस्तरका यस्ता प्रतियोगिताले खेलकुदको विकास र विद्यार्थीहरूको समग्र व्यक्तित्व विकासमा महत्वपूर्ण योगदान पुर्याउने विश्वास व्यक्त गर्नुभयो। उहाँले विद्यार्थी खेलाडीहरूलाई जितभन्दा बढी अनुशासन र मर्यादामा ध्यान दिन आग्रह गर्दै प्रतियोगितालाई सफल बनाउन सहयोग गर्ने सम्पूर्ण पक्षप्रति धन्यवाद व्यक्त गर्नुभयो।
बारबर्दिया नगरपालिकाको आयोजनामा र वडा नम्बर ७ स्थित जनता माध्यमिक विद्यालय, रम्मापुरको संयोजनमा सुरु भएको प्रतियोगितामा १६ वटा माध्यमिक विद्यालयका विद्यार्थीहरू सहभागी भएका छन्। उद्घाटन समारोहमा विद्यार्थीहरूले मार्चपास, साँस्कृतिक झाँकी, र स्थानीय तथा राष्ट्रिय कलाकारहरूको आकर्षक प्रस्तुति प्रदर्शन गरेका थिए।
आजको कार्यक्रममा ८ सय मिटर दौड प्रतियोगिता सम्पन्न भएको छ भने भोलिदेखि भलिबल, कबड्डी, हाईजम्प, लंगजम्प, सटपुट लगायतका खेलहरू सञ्चालन हुने छन्। प्रतियोगिता कार्तिक २९ गतेसम्म सञ्चालन हुने बताइएको छ।
कार्यक्रममा प्रमुख जिल्ला अधिकारी, सुरक्षा निकायका प्रतिनिधि, राजनीतिक दलका सदस्य, शिक्षक, बुद्धिजीवी, पत्रकार र स्थानीय समुदायको सक्रिय उपस्थिति रहेको थियो।
