बारबर्दिया, २०८२ मंसिर २
बारबर्दियामा ‘विपद्मा किशोरकिशोरी प्रजनन् स्वास्थ्य तथा युवाको भूमिका’ विषयक अभिमुखीकरण कार्यक्रम सम्पन्न भएको छ। कार्यक्रम बारबर्दिया नगरपालिकाको आयोजनामा प्लान इन्टरनेशनल नेपाल र राधाकृष्ण थारु जनसेवा केन्द्र गुलरियाद्वारा सञ्चालित ‘सशक्त बालिका परियोजना’ अन्तर्गत आयोजना गरिएको हो।
अभिमुखीकरणमा रेडक्रसकर्मी तथा सामाजिक अभियन्ता महेशचन्द्र गौतमले विपद् जोखिम न्यूनिकरण तथा व्यवस्थापनका विषयमा विस्तृत जानकारी गराउनु भयो। उहाँले विपद्को समयमा किशोरकिशोरी प्रजनन् स्वास्थ्य तथा युवाको भूमिकाको महत्वबारे बलपूर्वक स्पष्ट गर्दै उत्थानशील समुदाय निर्माणका लागि सबैले विपद्मा सक्रिय रूपमा काम गर्नुपर्ने धारणा राख्नु भयो।
उहाँका अनुसार, विपद्मा गरिने कामले समुदायमा ‘म सुरक्षित छु’ भन्ने अनुभूति दिलाउने लक्ष्य राख्नुपर्छ।
गौतमले विपद्ले मानिसको मृत्यु, अंगभंग, धनसम्पत्ति नोक्सानी, तथा दैनिकी अस्तव्यस्त बनाउने जस्ता घटनाहरू निम्त्याउने भएकाले यसको न्यूनिकरण र व्यवस्थापन अनिवार्य रहेको बताउनु भयो। नेपाल विपद् जोखिममा उच्च दरमा पर्ने देश भएकाले नीतिगत व्यवस्था र कार्यान्वयन संयन्त्रलाई चुस्त–दुरुस्त बनाउनुपर्नेमा उहाँले जोड दिनुभयो।
विपद्को बेला किशोरी, महिला तथा फरक क्षमता भएका व्यक्तिहरू धेरै प्रभावित हुने तथ्य उदाहरणसहित प्रस्तुत गर्दै उहाँले विपद् पूर्वतयारी तथा प्रतिकार्य योजनामा जोखिममा रहेका समूहलाई प्राथमिकतामा राखेर काम गर्नुपर्ने बताउनु भयो ।
युवाहरूलाई पनि प्राथमिक भूमिकामा राखेर विपद् सम्बन्धी योजना तथा कार्यान्वयन अघि बढाउनुपर्नेमा उहाँको जोड थियो। नेपाल सरकारले युवा नीति तयार गरिसकेको उल्लेख गर्दै, उक्त नीतिलाई स्थानीय तहमा प्रभावकारी रूपमा कार्यान्वयन गरी विपद् व्यवस्थापनमा युवाको सहभागिता सुनिश्चित गर्न आवश्यक रहेको अभिमुखीकरणकर्ता गौतमले बताउनु भयो ।
कार्यक्रममा बारबर्दिया नगरप्रमुख छबिलाल थारुले नगरपालिका विपद् जोखिम न्यूनीकरणका लागि संवेदनशील रहेको बताउँदै, युवालाई विपद् व्यवस्थापन कार्यमा संलग्न गराउन स्थानीय सरकार प्रतिबद्ध रहेको स्पष्ट गर्नुभयो।
नगरप्रमुखको अध्यक्षतामा सम्पन्न कार्यक्रममा वडा अध्यक्षहरू, बारबर्दिया नगरपालिकाका विषयगत शाखा प्रमुख तथा प्रतिनिधिहरू, युवा प्रतिनिधि तथा सञ्चारकर्मीहरूको सहभागिता रहेको थियो।
