ठाकुरबाबा (बर्दिया) — ठाकुरबाबा नगरपालिका स्तरीय युवा संजालको साझा योजना र सरोकारवालाहरुको भूमिकासम्बन्धी अन्तरक्रिया कार्यक्रम शुक्रबार ठाकुरबाबा नगरपालिका–१, भुरीगाउँमा सम्पन्न भएको छ।
प्लान इन्टरनेशनल नेपाल र राधाकृष्ण थारु जनसेवा केन्द्र गुलरियाको साझेदारीमा सञ्चालित सशक्त बालिका परियोजना अन्तर्गत आयोजना गरिएको कार्यक्रममा युवाहरुले स्थानीय सरकारका अभियान तथा कार्यक्रमहरूमा सहकार्य गर्न तयार रहेको प्रतिबद्धता जनाएका छन्।
युवाहरुले विशेषगरी बाल विवाह न्युनिकरण अभियानमा सक्रिय भूमिका निर्वाह गर्दै आएका छन्। उनीहरुले वडास्तरीय समन्वय र सहकार्यका माध्यमबाट समुदायमा सकारात्मक परिवर्तन ल्याउने योजनाबारे जानकारी गराएका थिए।
कार्यक्रममा वडा नम्बर २ का अध्यक्ष कमल प्रसाद चपाई, वडा नम्बर ३ का अध्यक्ष श्रीकृष्ण थारु, वडा नम्बर ६ का अध्यक्ष जयप्रसाद पौड्याल र वडा नम्बर ७ का अध्यक्ष कलमबहादुर विष्टले युवाहरुसँग मिलेर काम गर्न वडास्तरमा पूर्ण सहयोग गर्ने प्रतिबद्धता जनाउनुभयो। उहाँहरूले बाल विवाह र समुदायमा रहेका हानिकारक अभ्यासहरू अन्त्य गर्न युवाहरूको सक्रियता अत्यावश्यक रहेको उल्लेख गर्नुभयो।
अन्तरक्रियामा सहभागी मिडिया प्रतिनिधि, टोलविकास संस्था, बरघर र जनप्रतिनिधिहरूले पनि युवा संजालका योजनामा सहकार्य गर्न तयार रहेको बताएका छन्।
युवा संजालले निकट भविष्यमै नगरस्तरीय संरचनालाई वैधानिक रूपमा दर्ता गर्ने प्रक्रिया अघि बढाइरहेको जानकारी समेत दिएको छ।
