होमेन्द्र थापा, बर्दिया
बर्दिया — गुलरिया नगरपालिका वडा नम्बर १२ स्थित बिक्री गाउँमा जनयुद्धकालीन वेपत्ता योद्धा कृष्ण प्रसाद थारुको शालिक नेपाल कम्युनिस्ट पार्टी (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले अनावरण गर्नुभएको छ।
पूर्व–पश्चिम हुलाकी मार्ग केन्द्रित “जनता संग माओवादी, तराई–मधेश जागरण अभियान” अन्तर्गत आयोजित विशेष कार्यक्रममा अध्यक्ष प्रचण्डले शालिक अनावरण गर्नुका साथै शहीद तथा वेपत्ता योद्धाका परिवारजनसँग भेटघाट समेत गर्नुभएको थियो।
कार्यक्रमलाई सम्बोधन गर्दै अध्यक्ष प्रचण्डले जनयुद्धमा योगदान दिएका शहीद तथा वेपत्ता योद्धाहरूको सम्मान र तिनका परिवारको जीवनस्तर उकास्न राज्य प्रतिबद्ध रहेको उल्लेख गर्नुभयो। उहाँले शहीद तथा वेपत्ता परिवारको नाममा स्मृति पार्कहरूको निर्माण, राहत तथा परिपूर्ति, रोजगारीको व्यवस्था, प्रमाणपत्र वितरण लगायत विशेष सुविधा उपलब्ध गराउने व्यवस्था राज्यकै पहलमा गरिने जानकारी दिनुभयो।
“यस्ता कामको ढोका खोलिँदै गएको छ, बर्दियाका पीडित परिवारहरूसँग प्रत्यक्ष भेट गर्न पाउँदा केही सन्तोष मिलेको छ,” अध्यक्ष प्रचण्डले भन्नुभयो।
तराई–मधेश जागरण अभियान अन्तर्गत अध्यक्ष प्रचण्ड नेतृत्वको टोलीले बर्दियाका बढैयाताल गाउँपालिका, गुलरिया नगरपालिका, मधुवन नगरपालिका र ठाकुरबाबा नगरपालिकामा आयोजित खबरदारी सभा, भेटघाट कार्यक्रम तथा शालिक अनावरण सहित कुल ६ वटा कार्यक्रममा सहभागिता जनाएको थियो।
