बर्दिया,
बर्दिया जिल्लाको मधुवन नगरपालिका–स्थित नेपाल राष्ट्रिय नमुना माध्यमिक विद्यालय, ढोढरीको ५८औँ वार्षिकोत्सव समारोह भव्य रूपमा सम्पन्न भएको छ। कार्यक्रमको उद्घाटन लुम्बिनी प्रदेशका सामाजिक विकास मन्त्री जन्मजय तिमिल्सिना ज्यूले गर्नुभएको हो।
समारोहलाई सम्बोधन गर्दै मन्त्री तिमिल्सिनाले गुणस्तरीय शिक्षा नै समृद्ध समाज निर्माणको आधार भएको उल्लेख गर्नुभयो। उहाँले विद्यालयले शिक्षा, अनुशासन र सामाजिक मूल्यको विकासमा खेलेको भूमिकाको प्रशंसा गर्नुभयो।
कार्यक्रममा मधुवन नगरपालिकाका नगर प्रमुख तेजबहादुर भाट, समाजसेवी सुरेश पन्त, नगर प्रवक्ता मेकबहादुर गुरुङ, वडा अध्यक्ष बलिराम, समाजसेवी हरिहर चौधरी तथा विदुर पौडेललगायतले शुभकामना मन्तव्य व्यक्त गर्नुभएको थियो।
विद्यालय व्यवस्थापन समितिका अध्यक्ष गुलाबलाल चौधरीको अध्यक्षतामा सम्पन्न कार्यक्रममा प्रधानाध्यापक पूर्णचन्द्र पोखरेलले स्वागत मन्तव्य राख्नुभएको थियो। वार्षिकोत्सवको अवसरमा विभिन्न विधामा उत्कृष्ट शिक्षक तथा विद्यार्थीहरूलाई सम्मानसमेत गरिएको थियो।
कार्यक्रममा विद्यार्थीहरूले प्रस्तुत गरेका विविध सांस्कृतिक झाँकी र नृत्यले समारोहलाई अझ रंगीन र आकर्षक बनाएको थियो। स्थानीय अभिभावक, विद्यार्थी तथा नागरिकहरूको उल्लेखनीय सहभागिता रहेको उक्त कार्यक्रमले विद्यालयप्रतिको विश्वास र अपनत्व झल्काएको सहभागीहरूको भनाइ थियो।
