जिल्ला सहकारी संघ लि., बर्दियाले ६९औँ सहकारी दिवसको अवसरमा “सहकारीका सफलता, सवलता, समस्या एवं चुनौती” विषयक अन्तरक्रिया कार्यक्रम सम्पन्न गरेको छ।
कार्यक्रमका प्रमुख अतिथि प्रमुख जिल्ला अधिकारी गोगन बहादुर हमाल रहनु भएको थियो भने विशिष्ट अतिथिमा एकीकृत कृषि तथा पशुपन्छी विकास कार्यालयका प्रमुख कमला अधिकारी रहनु भएको थियो। कार्यक्रममा सहकारी अभियन्ता प्रेम पोखरेल, गोपाल पौडेल लगायत जिल्लाभरका सहकारीकर्मीहरूको उल्लेखनीय सहभागिता रहेको थियो।
अन्तरक्रियामा सहकारी क्षेत्रका उपलब्धि, सुदृढ पक्ष, विद्यमान समस्या तथा चुनौतीबारे व्यापक छलफल गरिएको थियो। सहभागीहरूले सहकारी अभियानलाई थप प्रभावकारी, पारदर्शी र दिगो बनाउन आवश्यक रणनीतिहरू प्रस्तुत गरेका थिए।
सो अवसरमा सहकारी क्षेत्रको विकासमा उल्लेखनीय योगदान पुर्याउने विभिन्न सहकारी संस्था, सहकारी अभियन्ता तथा कर्मचारीलाई सम्मान गरिएको थियो। सम्मानित हुनेहरूमा सहकारी अभियन्ता प्रेम प्रसाद पोखरेल रहेका छन्। कर्मचारीतर्फ बबई स्वावलम्बन सहकारीका व्यवस्थापक गगाराम शर्मा तथा नारी कल्याणकारी सहकारीकी प्रबन्धक पाबर्ती चौधरी सम्मानित भएका छन्।
त्यसैगरी संस्थागततर्फ विश्वसनीय बचत तथा ऋण सहकारी संस्था, ठाकुरबाबा, जनप्रिय दुग्ध उत्पादन सहकारी संस्था लिमिटेड, प्रभात कृषि बहुउद्देश्यीय सहकारी संस्था लिमिटेड, विश्राम कृषि महिला सहकारी संस्था लिमिटेड (मैनापोखर), भविष्य साना किसान कृषि सहकारी संस्था लिमिटेड, सिलसिला सामाजिक उद्यमी महिला सहकारी संस्था लिमिटेड तथा एचोपैचो कृषि सहकारी संस्था लिमिटेडलाई समेत सम्मान गरिएको छ।
कार्यक्रम जिल्ला सहकारी संघका अध्यक्ष नवराज ढुंगानाको सभापतित्वमा सम्पन्न भएको थियो भने कार्यक्रम सञ्चालन सचिव इन्दिरा सुवेदीले गर्नु भएको थियो। कार्यक्रममा सहकारी क्षेत्रलाई सुदृढ, पारदर्शी र जनमुखी बनाउन सबै पक्षको सहकार्य आवश्यक रहेकोमा जोड दिइएको थियो।
