गुलरिया, साउन १२। गुलरिया नगरपालिकामा वडा विपद् व्यवस्थापन समितिका पदाधिकारीहरूका लागि विपद् जोखिम न्यूनीकरण तथा जलवायु परिवर्तनसम्बन्धी एकदिने अभिमुखीकरण कार्यक्रम सम्पन्न भएको छ।
प्राक्टिकल एक्सन नेपाल, मेरी वातावरणीय विशिष्टता समूह (बी–ग्रुप), क्लाइमेट रेजिलिएन्स एलायन्स (Climate Resilience Alliance) तथा स्विस रे फाउन्डेसन (Swiss Re Foundation) को सहयोगमा सञ्चालित ‘समुदायका लागि जलवायु उत्थानशील कार्यक्रम’ अन्तर्गत उक्त अभिमुखीकरण कार्यक्रम आयोजना गरिएको हो।
कार्यक्रमको सभाध्यक्षता गुलरिया नगरपालिकाकी नगर उपप्रमुख सावित्रा गौतमले गर्नुभएको थियो भने प्रमुख अतिथि गुलरिया नगरपालिकाका प्रमुख प्रशासकीय अधिकृत कृष्णप्रसाद जैसी रहनुभएको थियो। कार्यक्रममा वडा स्तरीय विपद् व्यवस्थापन समितिका प्रतिनिधिहरू, नगर प्रहरी तथा अन्य सरोकारवालाहरूको उल्लेखनीय सहभागिता रहेको थियो।
अभिमुखीकरणमा विपद् आउनुअघि गर्नुपर्ने पूर्वतयारी, वडा विपद् व्यवस्थापन समितिको भूमिका र जिम्मेवारी, स्थानीय तहमा विपद् जोखिम न्यूनीकरणका उपाय, समुदायमा आधारित विपद् पूर्वतयारी, जलवायु परिवर्तनका प्रभाव तथा अनुकूलनका उपायबारे विस्तृत जानकारी प्रदान गरिएको थियो।
कार्यक्रमलाई सम्बोधन गर्दै सभाध्यक्ष सावित्रा गौतमले विपद् व्यवस्थापनमा वडा तहको सक्रियता र समुदायको सहभागिता अपरिहार्य रहेको बताउँदै प्राप्त ज्ञानलाई व्यवहारमा उतार्न सहभागीहरूलाई आग्रह गर्नुभयो।
त्यसैगरी प्रमुख अतिथि कृष्णप्रसाद जैसीले विपद् जोखिम न्यूनीकरणका लागि पूर्वतयारी, प्रभावकारी समन्वय र स्थानीय स्रोत–साधनको उचित परिचालन आवश्यक रहेको उल्लेख गर्दै वडा विपद् व्यवस्थापन समितिलाई जिम्मेवार र सक्रिय रूपमा परिचालन हुन आग्रह गर्नुभयो।
आयोजकका अनुसार वडा स्तरीय विपद् व्यवस्थापन समितिको क्षमता अभिवृद्धि गर्दै जलवायु परिवर्तनबाट उत्पन्न जोखिम न्यूनीकरण र सुरक्षित तथा उत्थानशील समुदाय निर्माण गर्ने उद्देश्यले उक्त अभिमुखीकरण कार्यक्रम सञ्चालन गरिएको हो।
