बर्दिया,
नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ सहितको उच्चस्तरीय पदाधिकारी टोली “जनतासँग माओवादी, तराई मधेस जागरण अभियान” अन्तर्गत बर्दिया पुगेको छ । टोलीले जिल्लाका विभिन्न स्थानमा अन्तरक्रिया, भेटघाट र जनसभा गर्ने कार्यक्रम तय गरेको छ ।
हिजो बेलुकी अध्यक्ष प्रचण्डले द्वन्द्वकालको समयमा माईती गाउँका रूपमा चिनिने बढैयाताल गाउँपालिका स्थित जगतिया गाउँमा बास बस्नु भएको छ । उहाँको उपस्थितिमा आज बिहानदेखि विभिन्न कार्यक्रमहरू सञ्चालन हुने छन् ।
आज बिहान ८ बजे बढैयाताल र बासगढी क्षेत्रका सहिद तथा बेपत्ता परिवारसँग अन्तरक्रिया कार्यक्रम आयोजना गरिएको छ । त्यसपछि बिहान १० बजे बढैयाताल–६ मैनापोखरमा आयोजित जनसभालाई अध्यक्ष प्रचण्डले सम्बोधन गर्नुहुनेछ ।
बिहान ११ः३० बजे गुलरिया नगरपालिका–१२ बिक्रीगाउँमा निर्मित सहिद कृष्ण चौधरीको शालिक अनावरण तथा सहिद परिवारसँग भेटघाट र जनसम्बोधनको कार्यक्रम तय गरिएको छ । त्यसैगरी दिउसो १२ बजेको समयमा गुलरिया नगर अधिवेशनको उद्घाटन कार्यक्रम पनि उहाँले गर्नुहुनेछ ।
त्यसपछि दिउँसो २ बजे मधुवन नगरपालिका लालीबजारमा जनसभा तथा ३ः३० बजे ठाकुरबाबा नगरपालिका–१ भुरीगाउँमा नागरिक संवाद कार्यक्रम आयोजना हुने नेकपा माओवादी केन्द्र बर्दिया जिल्ला इञ्चार्ज सन्तकुमार थाराले जानकारी दिनुभयो ।
अध्यक्ष प्रचण्डसँगै वरिष्ठ उपाध्यक्ष नारायणकाजी श्रेष्ठ, उपाध्यक्ष पम्फा भुसाल, अग्नि सापकोटा, महासचिव देव गुरुङ, उपमहासचिव वर्षमान पुन, जनार्दन शर्मा लगायतका शीर्ष नेताहरूको सहभागीता रहेको आयोजकले जनाएको छ ।
