होमेन्द्र थापा, राजापुर
बर्दिया राजापुर नगरपालिका–४ का स्थानीय बासिन्दा कर्णाली नदीको कटान रोक्न सामूहिक जनश्रमदानमा जुटेका छन् । कर्णाली नदीले आनन्तपुर घाट क्षेत्रमा तटबन्ध कटान गरिरहेका कारण गाउँ डुबानको उच्च जोखिममा परेपछि स्थानीयले दैनिक श्रमदानमार्फत अस्थायी बाँध निर्माण थालेका हुन् ।
संघर्षनगरका निर प्रसाद थारुका अनुसार प्रत्येक दिन २ सयभन्दा बढी स्थानीय श्रमदानमा सहभागी हुन्छन् । “नदीले निरन्तर कटान बढाएपछि गाउँ जोगाउन हामी बाध्य भएर अस्थायी तटबन्ध बनाउन जुटेका हौँ,” उहाँले बताउनु भयो ।
स्थानीयले रुख, झाला–पाता र बालुवाले भरिएका बोरा प्रयोग गरेर अस्थायी तटबन्ध निर्माण कार्य अघि बढाइरहेका छन् । दलैघाटतर्फबाट नदी पस्ने हो भने सङ्घर्षनगर, घुम्ना, दलैगाउँ, शिवपुर, अनन्तपुरलगायत एक दर्जन गाउँ डुबानमा पर्ने खतरा रहेको छ । राजापुर बजार क्षेत्रसमेत जोखिममा परेको स्थानीयले बताएका छन् ।
राजापुरबासीलाई प्रत्येक वर्ष मनसुनका बेला डुबानको समस्या भोग्नुपरेको छ । वर्षा नजिकिँदै गर्दा स्थानीय झनै चिन्तित बनेका छन् । आर्थिक वर्ष २०७१÷७२ मा ‘कर्णाली नदी व्यवस्थापन आयोजना’ स्थापना भए पनि बजेट अभावले दिगो संरचना निर्माणमा ढिलाइ भइरहेको छ । यसका कारण राजापुर बजार, हुलाकी राजमार्ग, सतीघाट पुल र श्रीलंका टापु उच्च जोखिममा रहेका छन् ।
