होमेन्द्र थापा, बर्दिया
बर्दिया जिल्लाको गुलरिया नगरपालिका–५ बालापुर गाउँकी ७ वर्षीया सायरा चौधरीको चितुवाको आक्रमणमा परी मृत्यु भएपछि आक्रामक चितुवाको खोजी सुरु गरिएको छ।
विहान करिब ८ बजे शौचालय जाने क्रममा घर नजिकै चितुवाको आक्रमणमा परेकी बालिकाको शव हाल बर्दिया अस्पतालमा राखिएको छ। घटनापछि आक्रोशित स्थानीयले जिल्ला प्रशासन कार्यालय घेराउ गर्दै सडक अवरुद्ध गरी विरोध जनाएका थिए।
स्थानीयको दबाबपछि प्रमुख जिल्ला अधिकारी रुद्रादेवी शर्माको निर्देशनमा निकुञ्ज, राष्ट्रिय प्रकृति संरक्षण कोष र डिभिजन वन कार्यालयका प्राविधिक टोली घटनास्थलमा खटाइएको छ।
चितुवाले सोही वडामा पटक–पटक आक्रमण गर्दै आएको भए पनि सम्बन्धित निकायले समयमै चासो नदिएको स्थानीयको गुनासो छ। उनीहरूले चितुवा तत्काल नियन्त्रणमा लिन, पीडित परिवारलाई उचित राहत उपलब्ध गराउन र सम्भव नभए स्थानीयलाई नै चितुवा मार्ने अनुमति दिनुपर्ने माग राखेका छन्।
प्रजिअ शर्माका अनुसार, चितुवा समात्ने टोली तत्काल परिचालन गरिएको र पीडित परिवारसँग छलफलपछि आक्रोशित भीडलाई शान्त पारिएको हो।
डिभिजन वन कार्यालय बर्दियाका वरिष्ठ अधिकृत रामकुमार चौधरीका अनुसार, चालु आर्थिक वर्षमा मात्रै चितुवाको आक्रमणबाट ४ जनाको ज्यान गएको, ५ जना गम्भीर घाइते भएका र १३१ वटा घरपालुवा चौपायामा क्षति पुगेको छ।
