बारबर्दिया,
बाल विवाह न्युनिकरणका लागि बारबर्दिया नगरपालिकाले विभिन्न गतिविधि सञ्चालन गर्ने भएको छ। समुदायमा बिकृति रूपमा मौलाउँदै गएको पर्छाैटी र बालविवाह बहुविवाह जस्ता समस्यालाई व्यवस्थित गराउन सामाजिक व्यवहार परिवर्तन सम्बन्धी रणनीति बनाई कार्यान्वयनमा लैजाने नगरप्रमुख छबिलाल थारुले बताउनु भयो। उहाँले यस विषयलाई विशेष चासोका साथ अगाडि बढाइने उल्लेख गर्दै संघसंस्था तथा सरोकारवालासँग सहकार्य अपरिहार्य हुनेमा जोड दिनुभयो।
यसै प्रसङ्गमा बारबर्दिया नगरपालिकास्तरीय धार्मिक तथा सामाजिक अगुवाहरुको संजालको बैठककाे निर्णयले समितिलाई पुनर्गठन गर्ने निर्णय गरेको छ। अघिल्लो सचिव विदेश गइसकेको र पालिका–वडा स्तरमा सक्रिय कार्यदल नहुँदा नयाँ संरचना आवश्यक देखिएको भन्दै बैठकले समितिलाई पुनः सशक्त बनाउन कार्ययोजना तयार गर्ने निर्णय गरेको हो।
नगरपालिकाका प्रमुख प्रशासकीय अधिकृत टिकानाथ गोसाई, वडा अध्यक्षहरु, विधायन समितिका सदस्यहरु, भेरी वातावरणीय विशिष्टता समूह (बी–ग्रुप) द्वारा सञ्चालित बाल विवाह न्युनिकरण परियोजनाका प्राविधिक संयोजक रामरुप कौशल, साथै नगर तथा वडा स्तरका धार्मिक र सामाजिक अगुवाहरुको सक्रिय उपस्थिति रहेको थियो।
बैठकले वडा स्तरका अगुवाहरुसँग सहकार्य गर्दै समितिको पुनर्गठन कार्ययोजना निर्माण गरी पालिकामा पेश गर्ने निर्णय गरेको छ। उपस्थित सहभागीहरुले बाल विवाह जस्ता गम्भीर सामाजिक समस्या समाधानका लागि धार्मिक तथा सामाजिक अगुवाहरुले अग्रणी भूमिका निर्वाह गर्नुपर्नेमा जोड दिएका थिए।
बैठकले समितिलाई थप प्रभावकारी, योजनाबद्ध र सहकार्यपूर्ण बनाएर सामाजिक व्यवहारमा सकारात्मक परिवर्तन ल्याउने जनाएको छ।
