प्रधानमन्त्री पुष्पकमल दाहाल प्रचण्डले नागरिक उन्मुक्ति पार्टीका संरक्षक रेशम चौधरीलाई कानुन बनाएर छिट्टै रिहाइ गरिने बताएका छन् ।
बिहीबार प्रतिनिधिसभा बैठकमा प्रश्नोत्तरका क्रममा नागरिक उन्मुक्ति पार्टीका सांसद गंगाराम चौधरीले सोधेको प्रश्नको जवाफमा प्रधानमन्त्री प्रचण्डले चौधरीसहितका राजबन्दी रिहाइका लागि विधेयक अघि बढेकाले छिट्टै जेलमुक्त हुने बताएका हुन् ।
प्रधानमन्त्री प्रचण्डले यसअघि अध्यादेश ल्याएर निर्णय गर्न खोज्दा नसकिएको बताए । ‘राजनीतिक आन्दोलनका राजबन्दीका विषयमा एकमुष्ट निर्णयका लागि विधेयक अघि बढेको छ,’ उनले भने, ‘अध्यादेशबाट छुटाउने प्रयास गरेकै हो । अदालतबाट जे फैसला भएपछि छिटो होस् भनेर अवाज उठाएकै हो । अहिले फैसला आएको छ । अब समस्या समाधान गर्ने विषयमा हामी गम्भीर छौँ ।’
