मधुवन— विदेशबाट फर्किएका युवालाई पुनः एकीकृत गर्दै स्वरोजगार तथा व्यावसायिक क्षमतामा उन्मुख गराउने उद्देश्यसहित मधुवन नगरपालिकामा रोजगार संवाद मञ्च सम्पन्न भएको छ। विदेशफर्का युवालाई उद्यमशीलतामा प्रवर्द्धन गर्ने लक्ष्यसहित कार्यक्रम आयोजना गरिएको हो।
कार्यक्रमको उद्घाटन गर्दै नगरप्रमुख तेजबहादुर भाटले मधुवन नगरपालिका माग–आधारित रोजगार तथा सीप विकास कार्यक्रम सञ्चालन गर्न तत्पर रहेको उल्लेख गर्नुभयो। विदेशबाट फर्केर व्यवसाय सुरु गर्न चाहने युवासँग नगरपालिकाले सहकार्य गर्न तयार रहेको उहाँको भनाइ थियो।
नगरउपप्रमुख अनिता चौधरीले विदेशबाट फर्किएका युवाले आफ्ना योजनाहरू स्पष्ट प्रस्तुत गरेमा स्थानीय सरकारले सोही अनुसारका कार्यक्रम बनाएर अघि बढ्न सकिने बताउनुभयो। सामूहिक तथा साझा योजनामा स्थानीय तहबाट सहयोग प्राप्त गर्न सहज हुने उल्लेख गर्दै उहाँले निरन्तर सम्पर्क र समन्वयमा रहन आग्रह गर्नुभयो।
निमित्त प्रमुख प्रशासकीय अधिकृत पार्वती पण्डितले विदेशफर्का युवाका आवश्यकता सम्बोधन हुने किसिमका कार्यक्रम सञ्चालन गर्दै आएको र थप प्रभावकारी कार्यक्रम ल्याउने तयारी भइरहेको जानकारी दिनुभयो।
कार्यक्रममा सहभागी बिषयगत शाखा प्रमुखहरूले आफ्नो–आफ्नो क्षेत्रका व्यवसायमा रुचि राख्ने युवालाई शाखासँग प्रत्यक्ष सम्पर्क गर्न आग्रह गरेका थिए। पशु सेवा शाखाका प्रमुख गणेशबहादुर बोहरा, कृषि शाखा प्रमुख एकराज वली, महिला तथा बालबालिका शाखा प्रमुख इन्दिरा चुनारा, लघु उद्यम विकास शाखाकी जानकी नेपालीलगायतले उपलब्ध सेवा, सुविधा र सहायताबारे जानकारी गराए।
कार्यक्रमको उद्देश्य तथा पृष्ठभूमि संचारकर्मी सितल थापाले प्रस्तुत गर्नुभएको थियो। रोजगार सेवा केन्द्रका प्रमुख अशिष परियारले स्वागत मन्तव्य दिंदै कार्यक्रमको रूपरेखा बारे जानकारी कगराउनुभएको थियो।
सहभागी युवाहरूले विदेशबाट फर्केकाहरुलाई स्थानीय सरकारले सीप, दक्षता र क्षमताका आधारमा सहयोग र सहकार्य बढाउनुपर्ने आवश्यकता औंल्याएका थिए।
