बर्दिया ।
लुम्बिनी प्रदेश सरकारको स्वास्थ्य मन्त्रालयअन्तर्गत स्वास्थ्य निर्देशनालय, स्वास्थ्य कार्यालय बर्दियाले आयोजना गरेको जिल्ला स्तरीय वार्षिक समीक्षा कार्यक्रममा बारबर्दिया नगरपालिकाले उत्कृष्ट प्रदर्शन गर्दै दोस्रो स्थान हासिल गरेको छ।
आर्थिक वर्ष २०८१/८२ मा स्थानीय तह स्तरबाट सञ्चालन भएका जनस्वास्थ्यसँग सम्बन्धित कार्यक्रम र गतिविधिहरूको मूल्याङ्कनका आधारमा बारबर्दिया नगरपालिकाले यो सफलता हासिल गरेको स्वास्थ्य कार्यालय बर्दियाले जनाएको छ।
स्वास्थ्य सेवाको प्रभावकारी कार्यान्वयन, जनस्वास्थ्य सचेतना अभिवृद्धि तथा स्वास्थ्य पूर्वाधार सुदृढीकरणमा बारबर्दिया नगरपालिकाको प्रयासलाई उच्च मूल्याङ्कन गर्दै सम्मानपत्र प्रदान गरिएको हो।
नगरपालिकाले प्राप्त गरेको यस सफलताको श्रेय स्वास्थ्य शाखाको कुशल नेतृत्व, स्वास्थ्यकर्मीहरूको समर्पित सेवा र महिला स्वास्थ्य स्वयंसेविकाहरूको अथक योगदानलाई जानेको छ।
स्वास्थ्य सेवाको गुणस्तर वृद्धिमा निरन्तर योगदान दिँदै आएको बारबर्दिया नगरपालिकाले आगामी दिनमा अझ प्रभावकारी रूपमा सेवा विस्तार गर्ने प्रतिबद्धता जनाएको छ।
