होमेन्द्र थापा, बर्दिया
बर्दियाको गुलरियामा नयाँ पुस्ताका युवायुवतीलाई लक्षित गर्दै पाँच दिने आधारभूत उद्घोषण तालिम सुरु गरिएको छ । बर्दियाली कलाकार मञ्च, गुलरिया बर्दियाको आयोजनामा, वडा नम्बर ५ कार्यालयको समन्वय तथा पर्यटन डिभिजन कार्यालय, कोहलपुर बाँकेको आर्थिक सहयोगमा सञ्चालन भएको हो ।
गाउँ–ठाउँमा सञ्चालन हुने विभिन्न कार्यक्रमका लागि बाहिरबाट उद्घोषक ल्याउनुपर्ने अवस्थाको अन्त्य गर्ने उद्देश्यले तालिम आयोजना गरिएको आयोजकले जनाएको छ ।
बुधबारदेखि सुरु भएको तालिममा अनुभवी प्रशिक्षकहरूद्वारा उद्घोषण शैली सम्बन्धी सैद्धान्तिक तथा प्रयोगात्मक दुवै प्रकारका प्रशिक्षण दिइँदैछ । तालिममा गुलरिया नगरपालिका र बारबर्दिया नगरपालिकाका १६ जना महिला र ७ जना पुरुष गरी जम्मा २३ जना सहभागी रहेका छन् ।
बर्दिया जिल्ला थारु समुदायको बहुलता रहेको क्षेत्र भए पनि अझै कतिपय सदस्यहरू सार्वजनिक रूपमा आफ्नो परिचय दिन हिच्किचाउने तथा नेतृत्व तहमा पुग्न नसक्ने चुनौतीहरू देखिँदै आएका छन् । यस सन्दर्भमा तालिमले सहभागीहरूको आत्मविश्वास अभिवृद्धि गर्दै नेतृत्व विकासमा टेवा पुग्ने विश्वास गरिएको छ ।
आयोजक संस्था थारु कलाकार मञ्च, गुलरिया बर्दियाका अध्यक्ष महेशराम चौधरीका अनुसार सहभागी छनोट सिफारिसका आधारमा नभई उनीहरूको इच्छाशक्ति र शैक्षिक योग्यतालाई प्राथमिकता दिइएको हो । उहाँले तालिममार्फत स्थानीय स्तरमै दक्ष उद्घोषक उत्पादन हुने अपेक्षा व्यक्त गर्नुभयो ।
