बारबर्दिया नगरपालिका–७ को नयाँ प्रशासनिक भवन उद्घाटन गरिएको छ। नगरप्रमुख छबिलाल थारु र उपप्रमुख रत्नकुमारी पाण्डेले एक विशेष समारोहबीच भवनको उद्घाटन गर्नुभएको हो।
स्थानीय तहको पूर्ण संरचना कार्यान्वयनपछि वडाको कार्यालय सामुदायिक भवनमा सञ्चालन हुँदै आएको थियो। अब भने सिंहदरबारको सेवा गाउँगाउँमा पुर्याउने लक्ष्यअनुसार सेवा प्रवाहका लागि स्थायी प्रशासनिक भवन निर्माण गरिएको हो। हाल कतिपय वडाहरूमा भवन निर्माण भइरहेको छ भने केही वडाहरू आफ्नै भवनबाट सेवा दिन थालेका छन्।
उद्घाटन कार्यक्रममा नगरप्रमुख थारुले नयाँ भवन सञ्चालनमा आएपछि सेवा प्रवाह अझ सहज र प्रभावकारी हुने विश्वास व्यक्त गर्नुभयो। उहाँले साघुरो स्थानमा सेवा दिन कठिन भएको उल्लेख गर्दै अब भने नागरिकले सजिलै सेवा पाउने वातावरण बनेको बताउनुभयो। साथै, यो भवन वडा नम्बर ७ को सम्पत्ति भएकाले यसको संरक्षण र सदुपयोगमा स्थानीयवासीको भूमिका महत्वपूर्ण रहने कुरामा जोड दिनुभयो।
नगरउपप्रमुख रत्नकुमारी पाण्डेले वडा कार्यालय नागरिकको सबैभन्दा नजिकको सरकारी सेवा केन्द्र भएकोले जनताको सहज पहुँच र सेवा सुनिश्चित गर्न प्रशासनिक भवन आवश्यक रहेको बताउनुभयो। जनताको चाहना अनुसार काम भइरहेको उहाँको भनाइ थियो।
वडा अध्यक्ष इन्द्रप्रसाद थारुले निरन्तर प्रयासपछि भवन निर्माण सम्पन्न भएको जानकारी दिनुभयो। प्रशासनिक भवनको अभावले सेवा प्रवाहमा कठिनाइ भइरहेको अवस्थामा अब सजिलै सेवा दिन सकिने विश्वास उहाँले व्यक्त गर्नुभयो।
