बारबर्दिया नगरपालिका स्वास्थ्य शाखा, बर्दियाले क्षयरोग नियन्त्रण तथा अन्त्य गर्ने उद्देश्यले एआई एक्स–रे विधिद्वारा सक्रिय क्षयरोग खोजपड्ताल शिविर सञ्चालन गर्ने भएको छ। “हो ! हामी क्षयरोग अन्त्य गर्न सक्छौं । राष्ट्रिय अभियान, हाम्रो योगदान” भन्ने नारासहित शिविर सञ्चालन गर्न लागिएको हो।
नगरपालिकाका स्वास्थ्य शाखा प्रमुख गोबिन्द पौडेलका अनुसार शिविर विभिन्न वडामा चरणबद्ध रूपमा सञ्चालन हुनेछ। बैशाख २३ गते वडा नं. १ स्थित पहाडीपुर आधारभूत स्वास्थ्य केन्द्रमा, बैशाख २४ गते वडा नं. ४ को पदनाहा स्वास्थ्य चौकीमा, बैशाख २५ गते वडा नं. ७ को सिउनिया आधारभूत स्वास्थ्य केन्द्रमा तथा बैशाख २६ गते वडा नं. ११ को लम्किफाँटा आधारभूत स्वास्थ्य केन्द्रमा शिविर सञ्चालन गरिनेछ।
शिविरमा एआई एक्स–रे प्रविधिको प्रयोग गरी क्षयरोगका सम्भावित बिरामीहरूको प्रारम्भिक परीक्षण तथा सक्रिय खोजपड्ताल गरिने जनाइएको छ। यस प्रविधिबाट रोगको पहिचान छिटो, सहज र प्रभावकारी रूपमा गर्न सहयोग पुग्ने विश्वास गरिएको छ।
कार्यक्रमलाई वि एन एम टी नेपालले प्राविधिक सहयोग प्रदान गरेको छ। नगर स्वास्थ्य शाखाले सम्बन्धित वडाका नागरिकलाई तोकिएको मितिमा स्वास्थ्य संस्थामा उपस्थित भई सेवा लिन आग्रह गरेको छ।
स्वास्थ्य शाखा प्रमुख पौडेलका अनुसार क्षयरोग समयमै पहिचान र उपचार गर्न सके पूर्ण रूपमा निको हुने भएकाले लक्षण देखिएमा परीक्षण गराउन सबैलाई आग्रह गर्नु भएको छ ।
