कञ्चनरूप पडेमाराका अग्निपीडितलाई नगद राहत वितरण

कञ्चनरूप। कञ्चनरूप पडेमाराका अग्निपीडितलाई जिल्ला विपद् व्यवस्थापन समिति सप्तरीले बुधबार १६ परिवारलाई नगद राहत वितरण गरेको छ ।
जिल्लाको कञ्चनरूप नगरपालिका वाड नं। ५ पडेमाराका सरदार बस्तीका अग्निपीडितलाई नगद राहत वितरण गरिएको जिल्ला विपद् व्यवस्थापन समितिका संयोजक तथा प्रमुख जिल्ला अधिकारी किरण थापाले जानकारी दिए । आगलागी पीडित परिवार सदस्य सङ्ख्या पाँचभन्दा कम भएका परिवारलाई प्रति परिवार १५ हजार र सोभन्दा माथि सदस्य सङ्ख्या भएको परिवारलाई प्रति परिवार २० हजारका दरले नगद प्रदान गरेको प्रजिअ थापाले जानकारी दिए।
कञ्चनरूप नगरपालिका उपप्रमुख मुनाकुमारी पोखरेल, विभिन्न वडाका वडाध्यक्षहरू र जिल्ला विपद् व्यवस्थापन समितिका सदस्यहरूको उपस्थितिमा वितरण गरिएको नगद राहत पाएपछि अग्निपीडित निकै हर्षित देखिएका थिए ।
गत आइतबार दिउँसो ३ बजे लालमोहन सरदारको गोठमा बालेको चुलोको आगोबाट सल्केर आगलागी हुँदा १२ जनाको २४ घर टहरा जलेर नष्ट भएको थियो । आगलागीमा एक बाख्रा र एक पाठो जलेर मृत्यु हुँदा करिब २४ लाख २५ हजार बराबरको धनसम्पत्ति जलेर नष्ट भएको प्रहरीले अनुमान गरिएको छ ।