बारबर्दिया नगरपालिकाको आयोजनामा स्थानीय उत्पादनमा आधारित पोषिलो दिवाखाजा तयारी तथा खाद्य सामग्री भण्डारण सम्बन्धी ३ दिने क्षमता विकास तालिम मंसिर २६ गतेदेखि सुरु भएको छ। नगरपालिकाको कार्यालय जयनगरमा आयोजित तालिममा विद्यालयका भान्छे तथा सहयोगीहरूको सक्रिय सहभागिता रहेको छ।
उद्घाटन कार्यक्रममा प्रमुख प्रशासकीय अधिकृत गौतम भण्डारीले विद्यालयस्तरमा सञ्चालित दिवाखाजा कार्यक्रमलाई अझ प्रभावकारी, सुरक्षित र स्वच्छ बनाउने उद्देश्यले यस्तो तालिम आवश्यक रहेको बताउनुभयो। उहाँले किचन व्यवस्थापनदेखि खाने पानीको गुणस्तरसम्म प्रत्येक चरणमा सावधानी अपनाउनुपर्नेमा जोड दिनुभयो।
उही कार्यक्रममा शिक्षा शाखा प्रमुख टिकानाथ गोसाईंले दिवाखाजालाई बालबालिकाको स्वास्थ्य, सिकाइ उपलब्धि र विद्यालयमैत्री वातावरणसँग प्रत्यक्ष सम्बन्धित कार्यक्रम भएकाले खाना पकाउने कोठा छुट्टै राख्ने, धुवारहित वातावरण बनाउने, भाँडा–कुचौरा सफा राख्ने, प्लास्टिक भाँडाको प्रयोग नगर्ने, टिफिन बक्स जाँच गरी मात्र वितरण गर्ने जस्ता अभ्यास अनिवार्य रूपमा पालना गर्नुपर्ने बताउनुभयो।
त्यसैगरी पशु सेवा शाखा प्रमुख दीपक थापा र कृषि शाखा प्रमुख झलक राज खड्काले स्थानीयस्तरमा उत्पादन भएका स्वच्छ, ताजा र पोषणयुक्त खानेकुरा किसानबाटै विद्यार्थीको टिफिनसम्म पुर्याउने लक्ष्यअनुसार सबै शाखा र पालिकाले समन्वयमा कार्यक्रम सञ्चालन गरिरहेको जानकारी दिनुभयो।
तालिममा सरसफाइ, फोहर व्यवस्थापन, भान्साको सफाइ, खानेपानीको गुणस्तर निर्धारण, पोषिलो मेनु तयारी, भण्डारण तथा सुरक्षित वितरणका विषयमा व्यवहारिक सीप प्रदान गरिँदै छ। नगरपालिकाले दिवाखाजा कार्यक्रमलाई अझ सुदृढ र स्थानीय उत्पादनमा आधारित मोडलमा विस्तार गर्ने तयारीसमेत गरेको छ।
नेपाल राष्ट्र्यि आधारभूत विद्यालय तर्कापुरको सभाहलमा भईरहेको तालिममा ३९ वटा विद्यालयका भान्छे तथा सहयोगीहरुको सहभागिता रहेको छ ।
असल कार्य !