विराटनगर । विराटनगरमा जारी नेकपा एमालेको प्रथम कोशी प्रदेश अधिवेशनमा नयाँ नेतृत्व चयनका लागि साँझ ५ बजेदेखि मात्र मतदान सुरु हुने भएको छ । प्रदेश कमिटी सदस्यमा धेरैजनाको उम्मेदवारी परेकाले सहमति जुटाउन तथा नामावली प्रकाशन र मतदानका लागि व्यवस्थापन मिलाउनका लागि समय लागेको बताइएको छ ।
विहान ११ बजेदेखि नै मतदान सुरु हुने भनिएकोमा अहिलेसम्म भएको छैन । प्रमुख निर्वाचन अधिकृत चुडामणि आचार्यले व्यवस्थापनका लागि समय अपुग भएकाले ५ बजेका लागि समय तय गरिएको जानकारी दिनुभयो । उहाँले उम्मेदवारको अन्तिम नामावली प्रकाशन गर्ने तयारी भइरहेको बताउनुभयो ।
एमालेको कोशी प्रदेश कमिटीको अध्यक्षमा मोरङका घनश्याम खतिवडा र विनोद ढकाल उम्मेदवार हुनुहुन्छ । उपाध्यक्षमा धनुकटाका टीकाराम चेम्जोङ निर्विरोध निर्वाचित हुनु भएको छ भने सचिवमा उदयपुरका शैलेश लामा र पाँचथरका राजकुमार भण्डारी उम्मेदवार हुनुहुन्छ ।
यसैगरि २ जना उपसचिवका लागि ३ जनाको उम्मेदवारी परेको छ । जसमा खोटाङका देवान राई, मोरङका खेम नेपाली र झापाकी जलवर्षा राजवंशी उम्मेदवार छन् । यसअघि संखुवासभाका भविश्वर गुरुङले पनि उम्मेदवारी दिनु भएकोमा फिर्ता लिनु भएको छ ।
अधिवेशनले २ सय १५ सदस्यीय प्रदेश कमिटीमा एक अध्यक्ष, एक उपाध्यक्ष, एक सचिव र दुई उपसचिवसहितको पदाधिकारी र सदस्यहरू निर्वाचित गर्नेछ । प्रदेश कमिटी सदस्य पदमा इलाम, पाँचथर र सोलुखुम्बूबाट सर्वसहमति भएको छ भने अन्य केही जिल्लामा पनि केही पदमा सर्वसहमति भएको छ ।
