होमेन्द्र थापा, बर्दिया
बर्दिया जिल्लामा चितुवाको आक्रमणबाट एकै दिन दुई जनाको मृत्यु भएको छ । मृत्यु हुनेमा गुलरिया नगरपालिका–४, तुल्सीपुरका ३६ वर्षीय नन्दु रोकाय र मधुवन नगरपालिका–९, गाउँ नम्बर १३ की ४९ वर्षीया मैसरा डाँगी रहेका छन् ।
नन्दु रोकाय घरदेखी करिब दुई किलोमिटर टाढा बबई नदी तरेर बारबर्दिया नगरपालिका–११ स्थित जनजागृति सामुदायिक वनमा घाँस काट्न जाँदै गर्दा चितुवाको आक्रमणमा परेका हुन् । मृतकका भाउजुका अनुसार रोकाय श्रीमती, भाउजु, मितिनी भाउजु लगायत पाँच जनाको समूहमा जंगलतर्फ गएका थिए ।
त्यसैगरी, मैसरा डाँगी नेपाल–भारत सीमा नजिक आफ्नै बारीमा छिमेकीहरूसँग घाँस काटिरहेका बेला चितुवाले आक्रमण गरी भारतीय वनतर्फ लगेको थियो । खोजी गर्ने क्रममा दशगजा नजिकको अरहर बारीमा उहाँको शव फेला परेको जिल्ला प्रहरी कार्यालय बर्दियाका प्रहरी नायब उपरीक्षक देवेन्द्रकुमार मल्लले जानकारी दिनुभयो ।
डिभिजन वन कार्यालयका अनुसार माघ महिनामा मात्र चितुवाको आक्रमणबाट तीन जनाको मृत्यु भइसकेको छ । गत पुस महिनामा चितुवाको आक्रमणबाट दुई जना, पाटेबाघको आक्रमणबाट एक जना र जंगली हात्तीको आक्रमणबाट एक जनाको ज्यान गएको थियो ।
जिल्लामा पछिल्ला दिनहरूमा चितुवाको आक्रमणका घटनाहरू बढ्दै गएका छन्। चालु आर्थिक वर्षमा मात्रै चितुवाको आक्रमणबाट आठ जनाको मृत्यु भइसकेको छ, जसमा छ जना महिला र दुई जना पुरुष रहेका छन् ।
