बारबर्दिया, बर्दिया — राष्ट्रिय अपांग महासंघका केन्द्रीय अध्यक्ष देवीदत्त आचार्यले अपांगमैत्री भौतिक संरचना निर्माणमा सबै पक्ष संवेदनशील बन्नुपर्ने आवश्यकता औँल्याउनुभएको छ।
बर्दियाको बारबर्दियामा युके एड र वाटर एडको आर्थिक सहयोग, नेपाल प्रजनन स्वास्थ्य केन्द्र र राष्ट्रिय अपांग महासंघको प्राविधिक सहकार्यमा बेस बर्दियाद्वारा सञ्चालित वास गेन्स परियोजना अन्तर्गत विभिन्न विद्यालयमा गरिएको संयुक्त अनुगमनका क्रममा अध्यक्ष आचार्यले वर्तमान संरचनाहरु अझै पनि पहुँचयुक्त बन्न पर्नेमा जाेड दिनु भएकाे छ ।
उहाँका अनुसार, आफ्नो तेस्रो चरणको अनुगमनसम्म आइपुग्दा केही सुधारका प्रयास देखिएकाे छ तर संरचना निर्माणमा संलग्न कामदारलाई प्रयाप्त तालिम नहुनु, अनुगमन तथा कार्यान्वयन पक्षमा अपांगमैत्री सोचको कमी हुनु, र ठोस योजना नहुनुले केही कमजाेर पक्ष देखिएकाे बताउनु भयाे ।
राष्ट्रिय अपांग महासंघले अपांगमैत्री संरचना निर्माणका लागि विविध अभियान तथा कार्यक्रम सञ्चालन गरिरहेको उल्लेख गर्दै अध्यक्ष आचार्यले प्राविधिकहरूलाई आवश्यक तालिम, र्याम्प, चुक्कुन, बत्तीका स्वीच, र रंग प्रयोगजस्ता कुरामा पहुँच सुनिश्चित गर्ने उपायमा केन्द्रित भई काम भइरहेको जानकारी दिनुभयो।
उहाँले समावेशी तथा पहुँचयुक्त पाठ्यक्रम विकास, विभेदकारी शब्द हटाउने नीतिगत सुधार, नीति निर्माण तहमा पैरवी, र अपांग व्यक्तिहरूलाई नेतृत्व तहमा पुर्याएर सक्रिय भूमिका दिनेलगायत कामहरू भइरहेको बताउनुभयो।
हाल देशभर करिब ४ सय संस्था राष्ट्रिय अपांग महासंघसँग आबद्ध छन् भने बर्दियामा “बर्दिया अपांग पुनःस्थापना केन्द्र” क्रियाशील रहेको उहाँले जानकारी दिनुभयो।
विपद्का बेला अपांगता भएका व्यक्तिलाई आवश्यक पूर्वसूचना, तालिम, समावेशी शिक्षा लगायत विषयमा काम भइरहेको उल्लेख गर्दै उहाँले अपांगता भएका व्यक्तिहरूलाई सरकारले अझै प्राथमिकतामा नराखेको महसुस भएकाले ऐन तथा नीतिको निर्माण र परिमार्जनका लागि महासंघ सक्रिय रूपमा लागिरहेको बताउनुभयो।
