बर्दिया,
देशभर फैलिएको रासायनिक मलको चरम अभाव, वितरण प्रणालीमा रहेको असमानता, र कालोबजारीका विरुद्ध आवाज उठाउँदै योङ कम्युनिष्ट लिग नेपाल (वाईसिएल), बर्दिया जिल्ला समितिले प्रमुख जिल्ला अधिकारीमार्फत सरकारलाई ज्ञापनपत्र बुझाएको छ।
ज्ञापनपत्रमा वाईसिएलले कृषिमा अत्यावश्यक मल समयमा आपूर्ति हुन नसकेको, किसानले खेत बाँझो राख्नुपर्ने अवस्था सिर्जना भएको, र राष्ट्रको खाद्य सुरक्षामाथि असर परिरहेको गम्भीर चिन्ता व्यक्त गरेको छ। सरकारका पटक–पटकका आश्वासनपछि पनि मल आपूर्ति सहज नहुँदा योजनाबद्ध रूपमा किसानहरूलाई प्रत्यक्ष असर परेको वाईसिएलको आरोप छ।
प्रेस विज्ञप्तिमा भनिएको छ, “सरकारले समयमा मल आपूर्ति गर्न नसक्ने, पहुँचको आधारमा असमान वितरण गर्ने, र दलालमार्फत कालाबजारी गर्ने कार्यले लाखौं किसान आक्रान्त छन्।” यस्तो गतिविधिको वाईसिएल नेपालले घोर भत्र्सना गर्दै तत्काल सुधार नगरे आन्दोलनको मार्ग रोजिने स्पष्ट चेतावनी दिएको छ।
त्यस्तै, बर्दियामा बबई नदीको बाढी घटेर नहरमा पानीको मात्रा निकै कम हुँदा सिँचाइको समस्या झनै बढेको भन्दै वैकल्पिक जलस्रोत व्यवस्थापनको माग पनि उठाइएको छ। साथै, वन्यजन्तुबाट अन्नबाली जोगाउन दीर्घकालीन उपाय अपनाउन समेत वाईसिएलले माग गरेको छ।
ज्ञापनपत्र वाईसिएल बर्दिया जिल्ला समितिका अध्यक्ष क. आकाश जि.सी. र इञ्चार्ज क. मञ्जु कुमारी सुनारको नेतृत्वमा बुझाइएको थियो।
