होमेन्द्र थापा,
बर्दियाका विभिन्न पेट्रोल पम्पहरूमा अनुगमन गरिएको छ। मंगलबार जिल्ला प्रशासन कार्यालय बर्दियाका सहायक प्रमुख जिल्ला अधिकारी रोशन कुमार कठायतको नेतृत्वमा गुणस्तर तथा नापतौल कार्यालय नेपालगंजबाट ल्याइएको चेक मेजर मेसिनमार्फत पेट्रोल, डिजेल र मट्टितेलको जाँच गरिएको हो।
अनुगमनका क्रममा उपभोक्तामात्र नभई पम्पका वितरकहरू समेत सन्तुष्ट देखिएका छन्। अनुगमन टोलीमा जिल्ला प्रशासन कार्यालय बर्दिया, गुणस्तर तथा नापतौल कार्यालय नेपालगंज, स्थानीय निकाय, घरेलु तथा साना उद्योग कार्यालय बर्दिया, उद्योग वाणिज्य संघ बर्दिया, उपभोक्ता संघ, प्रहरी तथा पत्रकारहरूको सहभागिता थियो।
अनुगमन बढैयाताल गाउँपालिका–८ को सुरज कर्णाली आयल डिष्ट्रिब्युटर्स प्रा.लि., गुलरिया नगरपालिका–६ को निलो आयल स्टोर, गुलरिया नगरपालिका–७ को हिमालय आयल स्टोर तथा मधुवन नगरपालिका–८ को चौधरी आयल स्टोर्समा गरिएको थियो। अनुगमनका क्रममा नाप–तौलको मिलान, टाँचा लगाइएको स्थान, पम्पको दर्ता र कर भुक्तानीको अवस्था लगायतका विषयहरू जाँच गरियो।
स्थानीय उपभोक्ताहरूले अनुगमनलाई सकारात्मक रूपमा लिँदै निरन्तर अनुगमन भएमा मिसावट रोक्न मद्दत पुग्ने र सही मूल्यमा पेट्रोलियम पदार्थ पाइने विश्वास व्यक्त गरेका छन्। बारबर्दिया नगरपालिका–४ का चन्ताराम थारुले भने, “यसरी नै अनुगमन भइरहे उपभोक्ताले सही मात्रा र मूल्यमा तेल पाउनेछन्।”
त्यसैगरी, बढैयातालस्थित सुरज कर्णाली आयल डिष्ट्रिब्युटर्स प्रा.लि.का प्रोप्राइटरले अनुगमनले व्यवसायमा पारदर्शिता बढ्ने भन्दै यसलाई आवश्यक प्रक्रिया भएको बताएका छन्। “अनुगमन हुँदा भएका कमीकमजोरी पत्ता लाग्छन्, यसरी बेलाबेला जाँच हुनुपर्छ,” उनले भने। स्थानीय प्रशासन र सम्बन्धित निकायहरूको सक्रियताले पेट्रोलियम पदार्थमा हुने अनियमितता न्यूनीकरणमा सहयोग पुग्ने विश्वास गरिएको छ।
