बारबर्दिया,
नगर स्तरीय पाँचौँ राष्ट्रपति रनिङ्ग सिल्ड खेलकुद प्रतियोगिता–२०८२ को अवसरमा बारबर्दिया नगरपालिका–७, रम्मापुर खेलमैदानमा मंगलबार १३औँ बृहत रक्तदान कार्यक्रम सम्पन्न भएको छ। कार्यक्रममा ४० जनाले रक्तदान गरेका छन्।
“रक्तदान जीवनदान” भन्ने नारा सहित आयोजित उक्त कार्यक्रम बारबर्दिया नगरपालिका र वडा नं. ७ कार्यालयको संयोजनमा सम्पन्न गरिएको हो। नेपाल रेडक्रस सोसाइटी बारबर्दिया उपशाखा र नेपाल स्वयंसेवी रक्तदाता समाजको प्राविधिक सहयोगमा सञ्चालन भएको कार्यक्रममा स्थानीय दाता, युवा स्वयंसेवक, स्वास्थ्यकर्मी, कर्मचारी, सञ्चारकर्मी, सुरक्षा निकायका प्रतिनिधि तथा सर्वसाधारणको उत्साहजनक सहभागिता रहेको थियो।
कार्यक्रमका आयोजकहरूले रक्तदान कार्यक्रमलाई सफल बनाउन सहयोग पुर्याउने सबै महानुभावप्रति हार्दिक आभार व्यक्त गरेका छन्। उनका अनुसार सहभागीहरूबाट प्राप्त रक्तले स्थानीय अस्पताल र स्वास्थ्य संस्थाहरूमा रगत अभावका कारण उपचारमा समस्या भोगिरहेका बिरामीहरूलाई सहयोग पुर्याउने अपेक्षा गरिएको छ।
रक्तदानमा सहभागी प्रत्येक व्यक्तिप्रति सम्मान व्यक्त गर्दै आयोजकहरूले आगामी दिनमा पनि यस्ता सामाजिक उत्तरदायित्वका अभियानलाई निरन्तरता दिने प्रतिबद्धता जनाएका छन्।
