बर्दिया,
बारबर्दिया नगरपालिकाले मुल बरघरहरूको सम्मान र पहिचानका लागि ७९ जनालाई झोला तथा छाता वितरण गरेको छ। जयनगरस्थित सामुदायिक सिकाइ केन्द्रमा आयोजित कार्यक्रममा नगर प्रमुख छविलाल थारुले वितरण गरिएको सामग्रीको सहि उपयोग गर्न आग्रह गर्नुभयो। उहाँले आगामी वर्षदेखि खोज्निबोझ्नी प्रक्रियामा अनिवार्य रूपमा वडा प्रतिनिधिको सहभागिता आवश्यक हुने जानकारी दिनुभयो। साथै, वडाको सिफारिसबाट मात्र मुल बरघरहरू नगरपालिकामा सूचीकृत गरिने बताउँदै टोलबरघरहरूलाई पनि वडाबाटै सूचीकृत गर्न आग्रह गर्नुभयो।
नगर प्रमुख प्रशासकीय अधिकृत टिकानाथ गोसाइँले बारबर्दिया नगरपालिका नेपालकै पहिलो स्थानीय तह हो जसले परम्परागत प्रथालाई कानुनी मान्यता दिँदै ‘बरघर ऐन’ निर्माण गरी कार्यान्वयनमा ल्याएको बताउनुभयो। पहिले मौखिक रुपमा अभ्यासमा रहेका कार्यहरू अब दस्तावेजीकरण हुँदै कानुनी रूपमा व्यवस्थित गर्न थालिएको उहाँको भनाइ थियो।
कार्यक्रममा वडा अध्यक्षहरूले मुल बरघरहरूले विकास निर्माण कार्यमा सक्रिय भूमिका खेलेको र सामाजिक विकासमा पनि योगदान पुर्याउँदै आएको उल्लेख गर्दै यस प्रक्रियालाई निरन्तरता दिनुपर्नेमा जोड दिनुभयो।
नगरपालिकाका ११ वडाहरूमा ४ देखि ९ जनासम्मका दरले कुल ७९ जना मुल बरघर रहेका छन्। कार्यक्रमको सञ्चालन वडा नम्बर २ का वडा अध्यक्ष रामफेरन थारुले गर्नुभएको थियो।
