बर्दिया – नेकपा माओवादी केन्द्रका अध्यक्ष पुष्पकमल दाहाल (प्रचण्ड) सहितको पदाधिकारी टोली भाेली बेलुकी बर्दिया आइपुग्ने भएका छन्। "जनतासँग माओवादी, तराई मधेस जागरण अभियान" अन्तर्गत चैत्र २२ गते बर्दियाका विभिन्न स्थानमा अन्तरक्रिया, भेटघाट तथा जनसभालाई सम्बोधन गर्ने कार्यक्रम रहेको छ।
माओवादी केन्द्र बर्दिया जिल्ला इन्चार्ज सन्त कुमार थारुका अनुसार अध्यक्ष प्रचण्ड नेतृत्वको टोली बढैयाताल गाउँपालिका, गुलरिया, मधुवन र ठाकुरबाबा नगरपालिकाका विभिन्न स्थानमा पुग्नेछ।
कार्यक्रम अनुसार अध्यक्ष प्रचण्डको टोली भाेली राति बढैयाताल गाउँपालिका-५, जगतिया माईती गाउँमा बस्नेछ। पर्सि बिहान ७ बजे बढैयातालको अवलोकन तथा मोर्निङ वाक गर्ने, बिहान ८ बजे जगतियामा सहिद तथा बेपत्ता परिवारसँग अन्तरक्रिया गर्ने कार्यक्रम रहेको छ।
त्यसपछि बिहान १० बजे बढैयाताल-६, मैनापोखरमा जनसभा आयोजना हुने र अध्यक्ष प्रचण्डले सम्बोधन गर्नेछन्। दिउँसो १२ बजे गुलरिया नगरपालिका-१२, बिक्रीगाउँमा सहिद कृष्ण चौधरीको शालिक अनावरण तथा सहिद परिवारसँग भेटघाट र जनसम्बोधन हुनेछ। सोही दिन १२ बजे बर्दियाको सदरमुकाम गुलरिया नगरपालिकामा नगर अधिवेशन उद्घाटन, दिउँसो २ बजे मधुवन नगरपालिकाको लालीबजारमा जनसम्बोधन, ३:३० बजे ठाकुरबाबा नगरपालिका-१, भुरीगाउँमा नागरिक संवाद कार्यक्रम तथा २२ गते बेलुकी ५ बजे बिदाई कार्यक्रम हुनेछ।
अभियानमा अध्यक्ष प्रचण्डसहित वरिष्ठ उपाध्यक्ष नारायणकाजी श्रेष्ठ, उपाध्यक्ष पम्फा भुसाल, अग्नि सापकोटा, महासचिव देव गुरुङ, उपमहासचिव वर्षमान पुन, जनार्दन शर्मा लगायतका नेताहरु सहभागी हुनेछन्। यसै क्रममा आज बाँके पुगेको माओवादी टोली भाेली साँझ बर्दियाको जगतिया माईती गाउँमा बास बस्न आउने कार्यक्रम रहेको छ।
