बारबर्दियाका विद्यालयहरू स्वच्छता र खानेपानी व्यवस्थापनमा अग्रणी
बारबर्दियाका विद्यालयहरू स्वच्छता र खानेपानी व्यवस्थापनमा अग्रणी

बर्दिया, 
बर्दियाको बारबर्दिया नगरपालिकाका विद्यालयहरू विद्यालय खानेपानी, सरसफाई तथा स्वच्छता (वास) प्रवद्र्धनमा अगाडि छन् । नगरपालिकाले विद्यालय खानेपानी, सरसफाई तथा स्वच्छता कार्यविधि २०८१ लागू गरी हालसम्म चार विद्यालयलाई तीन तारे विद्यालय घोषणा गरिसकेको छ भने पाँच विद्यालयलाई दुई तारे प्रमाणित गरिसकेको छ । प्रत्येक विद्यालयमा विद्यालय खानेपानी स्वच्छता समिति गठन गरी कार्यान्वयनका लागि निरन्तर पहल गरिँदै आएको छ ।
बारबर्दिया नगरपालिका वडा नम्बर ७ स्थित जनता माध्यमिक विद्यालयलाई तीन तारे विद्यालय घोषणा गरेसँगै नगरपालिकामा तीन तारे विद्यालयहरूको संख्या चार पुगेको छ । यसअघि वडा नम्बर ४ को पाञ्चजन्य माध्यमिक विद्यालय, वडा नम्बर ८ को जनज्योति आधारभूत विद्यालय, र वडा नम्बर ११ को नेपाल प्राज्ञिक आधारभूत विद्यालय तीन तारे विद्यालयको रूपमा घोषणा भइसकेको छ ।
लुम्बिनी प्रदेशका सामाजिक विकास मन्त्री जन्मजय तिमिल्सिनाले विद्यालय तीन तारे घोषणाले शिक्षण सिकाइ र सरसफाईमा सकारात्मक प्रभाव पार्ने बताउनुभयो । विद्यालयहरू समाज विकासका आधार भएकाले यसले शैक्षिक सुधार मात्र होइन, अनुशासन, नेतृत्व, र खेलकुदमा पनि सकारात्मक योगदान दिने उहाँको धारणा छ । उहाँले बारबर्दिया अन्य पालिका तथा जिल्लाहरूका लागि सिकाइको आधार बन्ने विश्वास व्यक्त गर्दै, खानेपानी र सरसफाइसँगै शैक्षिक गुणस्तर सुधारतर्फ अघि बढ्न आग्रह गर्नुभयो ।
लुम्बिनी प्रदेश सभा सदस्य राजकुमार थारूले विद्यालयहरूको शैक्षिक स्तर सुधारका लागि प्रदेश सरकार निरन्तर लागि परेको बताउनुभयो । विद्यालयहरूको आवश्यकताअनुसार भौतिक संरचना निर्माणमा सहयोग र्पुयाउने प्रतिबद्धता व्यक्त गर्नुभयो ।
बारबर्दिया नगरपालिकाका नगरप्रमुख छबिलाल थारूले शिक्षा क्षेत्रलाई उच्च प्राथमिकता दिँदै शैक्षिक गुणस्तरसँगै खानेपानी तथा सरसफाइ सुधारमा समेत ध्यान दिइरहेको जानकारी गराउनुभयो । नगरपालिकामा विद्यालयहरूको खानेपानी, सरसफाइ तथा स्वच्छता सुधारका लागि युके एड र वाटर एडको सहयोगमा बेस बर्दिया, राष्ट्रिय अपाङ्ग महासंघ, र नेपाल प्रजनन स्याहार केन्द्रको साझेदारीमा वास गेन्स परियोजना सञ्चालन भइरहेको छ ।