माघ १६ गते
बर्दिया जिल्लाको बारबर्दिया नगरपालिका वडा नम्बर १ र ठाकुरबाबा नगरपालिका वडा नम्बर ५ लाई जोड्ने बबई नदीको चन्दनपुरघाटमा पक्की पुल नबन्दा स्थानीयवासीहरू वर्षौंदेखि कष्टकर यात्रा गर्न बाध्य भएका छन्।
उक्त स्थानमा रहेको झोलुङ्गे पुल २०७४ सालको विनाशकारी बाढीले बगाएर लगेपछि हालसम्म पुनः पुल निर्माण हुन सकेको छैन। पक्की पुल निर्माणका लागि करिब पाँच वर्षअघि रातो किताबमा योजना समावेश भई डिपिआरका लागि बजेट समेत विनियोजन भए पनि हालसम्म निर्माणको सुनिश्चितता हुन सकेको छैन।
पछिल्लो समय पुल निर्माणलाई उत्तरतर्फको खैलारघाटतर्फ सार्ने प्रयास समेत गरियो, तर चन्दनपुरघाट र खैलारघाट दुबै स्थानमा पुल निर्माणको टुंगो लाग्न सकेको छैन। स्थानीयका अनुसार हरेक निर्वाचनको समयमा उम्मेदवार र नेताहरूले पुल निर्माणको आश्वासन दिने गरे पनि निर्वाचनपछि ती प्रतिबद्धता कार्यान्वयन नहुने प्रवृत्तिका कारण समस्या ज्यूँका त्यूँ रहेको हो।
अहिले २०८२ सालको निर्वाचन नजिकिँदै जाँदा पुनः उम्मेदवार र नेताहरूले आश्वासन दिन थालेका छन्। तर स्थानीयवासीहरू भने यसपटक केवल आश्वासनमा सीमित नहुने, पुल निर्माणको स्पष्ट र सुनिश्चित प्रतिबद्धता जनाउनेलाई मात्र मत दिने अडानमा रहेका छन्।
चन्दनपुरघाट क्षेत्रका बासिन्दाहरूलाई एक किलोमिटरको दूरी पार गर्न करिब २० किलोमिटरभन्दा बढी घुम्नुपर्ने बाध्यता छ। चन्दनपुरघाटबाट उत्तरतर्फ पर्ने परेवाओडारस्थित बबई पुल र दक्षिणतर्फको लठुहवाघाट पुल दुबै करिब १०–१० किलोमिटर टाढा रहेका छन्।
सुक्खा याममा मात्रै झारो तर्न सहज होस् भन्ने उद्देश्यले पालिकाले हेमपाइप राखी अस्थायी गोरेटो बाटो बनाएको भए पनि वर्षायाम तथा अन्य समयमा कुनै पनि सुरक्षित विकल्प नहुँदा स्थानीयहरू अत्यन्तै जोखिमपूर्ण यात्रा गर्न बाध्य छन्। स्थायी पक्की पुल निर्माण नहुँदा जनजीवन, शिक्षा, स्वास्थ्य र आर्थिक गतिविधिमा गम्भीर असर परेको स्थानीयहरूको गुनासो रहेको छ।
