सुन्दरहरैंचा । मोरङको उर्लाबारीका पत्रकार पुजन दासमाथि समाचार संकलन गरि फर्कने क्रममा कुटपिट भएको छ । समाचार संकलनकालागि मोरङको रतुवामाई पुगेर फर्किने क्रममा रतुवामाई १० स्थित एक मोटरसाइकल ग्यारेजमा दासमाथि कुटपिट भएको जनाइएको छ । सञ्चार क्लव नेपाल उर्लाबारीका कोषाध्यक्ष समेत रहेका दासमाथि ग्यारेजमा मोटरसाइकल मर्मत गराउँदै गरेको बेला ५,६ जनाको समूहमा आएका व्यक्तिहरुले आक्रमण गरि घाइते बनाएको सञ्चार क्लव नेपाल उर्लाबारीद्वारा जारी प्रेस विज्ञप्तीमा उल्लेख गरिएको छ ।
क्लवका अध्यक्ष नवराज भट्टराईद्वारा जारी विज्ञप्तीमा पत्रकारमाथि गुण्डागर्दी शैलीमा भौतिक आक्रमण हुनु समग्र प्रेस स्वतन्त्रता माथि नै धावा बोल्नु रहेको भन्दै घटनामा संलग्न दोषिलाई तत्काल पक्राउ गरि कानुनी कारवाहीका लागि प्रहरी प्रशासनसमक्ष माग गरिएको छ । घाइते पत्रकार दासको अनुहारमा चोट लागेको छ भने उनको उर्लाबारीस्थित गोदावारी अस्पतालमा उपचार भइरहेको छ । दास उर्लाबारीस्थित पूर्वी कमाण्ड अनलाइनमा कार्यरत छन् ।
