बारबर्दिया नगरपालिकाले अपाङ्गता भएका व्यक्तिहरूको ३४औँ अन्तर्राष्ट्रिय दिवसको अवसरमा अपाङ्गता भएका व्यक्ति तथा उनीहरूका अभिभावकसँग अन्तरक्रिया कार्यक्रम सम्पन्न गरेको छ। विभिन्न साझेदार संस्थाको समन्वयमा नगरपालिका महिला तथा बालबालिका शाखा र नगरस्तरीय अपाङ्गता सञ्जालको आयोजनामा कार्यक्रम भएको हो।
कार्यक्रममा सहभागी अपाङ्गता भएका व्यक्ति तथा अभिभावकहरूले स्थानीय सरकारले आफूहरूलाई लक्षित कार्यक्रम सञ्चालन गर्नुपर्ने आवश्यकता औँल्याए। अपाङ्गताको प्रकृतिअनुसार आवश्यक सहायतासामग्री उपलब्ध गराउनुपर्ने, वडा तहमा लक्षित कार्यक्रम नहुँदा गुनासो बढिरहेको तथा आय–आर्जन तथा सीप विकास तालिममा प्रमुख प्राथमिकतामा राखेर सहभागीता सुनिश्चित गर्नुपर्नेसहितका सुझावहरू राखिए। फरक क्षमताका व्यक्तिहरूको पहिचान गरी उनीहरूको क्षमता अनुरूप रोजगारी, कार्यक्रम तथा अवसर दिलाउनुपर्नेमा पनि जोड दिइयो।
अन्तरक्रिया कार्यक्रममा नगरप्रमुख छबिलाल थारुले सहभागीहरूले राखेका गुनासा र सुझाव स्वाभाविक भएको बताउँदै स्थानीय सरकारले धेरै काम गरिरहेको जानकारी दिनुभयो। “सबै माग पूर्णरूपमा पूरा नहुन सक्छ तर धेरै कुरा वस्तुगत छन्। आवश्यकताअनुसार सहायतासामग्री वितरण जारी छ, यो पर्याप्त नहोला तर निरन्तरता छ”, उहाँले भन्नुभयो। साथै वडा तहमा योजना तर्जुमा प्रक्रियामा सक्रिय सहभागिता जनाउन आग्रह गर्दै सहभागीता बढेमा आवश्यक कार्यक्रम कार्यान्वयनमा लैजान सकिने उल्लेख गर्नुभयो।
प्रमुख प्रशासकीय अधिकृत गौतम भण्डारीले अपाङ्गता क्षेत्र पहिलेदेखि धेरै सुधार भएको भन्दै नीतिगत तथा संरचनागत रूपमा धेरै काम भएको स्पष्ट पार्नुभयो। सहभागीहरूले राखेका माग र सुझावहरू उपलब्ध स्रोत र प्रक्रियाका माध्यमबाट सम्बोधन हुँदै जाने विश्वास व्यक्त गर्नुभयो।
महिला तथा बालबालिका शाखा प्रमुख उषा पुनले हरेक वर्ष अपाङ्गता भएका व्यक्तिलाई समेट्ने कार्यक्रमहरू सञ्चालन गर्दै आएको बताउँदै, सञ्जाल तथा व्यक्तिहरूबाट प्राप्त सुझाव र योजनालाई प्राथमिकतामा राखेर काम गर्नुपर्नेमा जोर दिनुभयो।
बारबर्दिया नगरस्तरीय अपाङ्गता सञ्जालका संयोजक सन्तोष देवकोटाको सभाध्यक्षतामा सम्पन्न कार्यक्रममा बारबर्दिया–१ देखि ११ वटै वडाबाट करिब एक सय जना सहभागी रहेका थिए।
