बारबर्दिया, कार्तिक २३ – बारबर्दियामा जारी छैठौं मेयरकप फुटबल प्रतियोगिताको छात्रा तर्फको उपाधि सिम्हा माध्यमिक विद्यालय, बारबर्दिया–११ बेलभारले जितेको छ । उपविजेता जनज्योति माध्यमिक विद्यालय, बारबर्दिया–९ बनगाईं बनेको छ ।
वडा नम्बर ७ घुस्रास्थित खेलमैदानमा भएको फाइनल खेल निर्धारित समयमा गोलरहित बराबरीमा सकिएपछि पेनाल्टी सुटआउटमा सिम्हा माविले ४–२ गोलको अन्तरले जित हासिल गर्दै उपाधि आफ्नो पक्षमा पारेको हो ।
यसैगरी, छात्रतर्फको अन्तिम खेल भोलि सोमबार बिहान ८ बजेबाट जनता माध्यमिक विद्यालय रम्मापुरको पाँच नम्बर खेलमैदानमा हुने आयोजकले जानकारी दिएको छ ।
बारबर्दिया नगरपालिकाको आयोजनामा र जनता माध्यमिक विद्यालय, रम्मापुरको संयोजनमा कार्तिक २१ गते शुक्रबारदेखि सुरु भएको प्रतियोगितामा बारबर्दियाका दुई संस्थागत र १४ सामुदायिक माध्यमिक विद्यालय सहभागी रहेका छन् । प्रतियोगिता भोलि सम्पन्न हुने छ ।
