होमेन्द्र थापा, बर्दिया
डल्फिन सम्बन्धी जानकारी तथा संरक्षणका लागि जनचेतना अभिवृद्धि गर्ने उद्देश्यले बर्दियामा दुई दिने तालिम आयोजना गरिएको छ ।
“डल्फिन बचाऔं, जैविक विविधता जोगाऔं” भन्ने मूल नारासहित राष्ट्रिय प्राकृतिक संरक्षण कोष, बर्दियाको आयोजनामा आइतबारदेखि तालिम सुरु भएको हो । तालिममा कैलाली र भजनी क्षेत्रका तीन वटा सामुदायिक समितिका २१ जना महिला तथा पुरुष सहभागी भएका छन् ।
तालिममा सहभागीहरूले डल्फिनको संरक्षण, लेखा व्यवस्थापन तथा समितिका पदाधिकारीहरूको जिम्मेवारी सम्बन्धी ज्ञान हासिल गरेको बताएका छन् । तालिमले संरक्षण कार्यमा सक्रिय हुन महत्वपूर्ण सहयोग पुगेको सहभागी नरेन्द्र प्रसाद रेग्मीले बताउनु भयो ।
डल्फिन पानीमा बस्ने स्तनधारी प्राणी हो, जसलाई मानिसपछि दोस्रो चेतनशील प्राणी मानिन्छ । यसले आफ्ना बच्चालाई दूध खुवाउने, समूहमा बस्ने र समूहमै मिलेर काम गर्ने विशेषता राख्दछ ।
नेपालका कोशी, नारायणी, कर्णाली र मोहना नदीमा पाइने डल्फिन पछिल्लो समय बर्दिया राष्ट्रिय निकुञ्ज आसपासका लालमटिया, पथ्थरबोझी, सतीघाट र कर्णाली चिसोपानी क्षेत्रमा समेत देखिन थालेका छन् ।
गत वर्ष गरिएको गणना अनुसार मोहना नदी हुँदै कर्णालीमा मिसिने क्षेत्रमा बच्चासहित ५२ वटा डल्फिन रहेको राष्ट्रिय प्राकृतिक संरक्षण कोषका प्रमुख अजित तुम्बाहाम्फेले जानकारी दिनुभयो ।
समुदायस्तरमा डल्फिन संरक्षण समिति गठन गरी तिनको क्षमता अभिवृद्धि गर्न यस्तो तालिम आयोजना गरिएको जनाइएको छ । संरक्षणकर्मीहरूले डल्फिन संरक्षणमा स्थानीय समुदायको सक्रिय सहभागिता आवश्यक रहेकोमा जोड दिएका छन् ।
