मधुवन नगरपालिकाको १६औं नगरसभामा, १ अर्ब ३ करोडको बजेट प्रस्तुत
होमेन्द्र थापा,
मधुवनअसार १० गते
बर्दियाको मधुवन नगरपालिकाले आर्थिक वर्ष २०८२/८३ का लागि १ अर्ब ३ करोड ४७ लाख रुपैयाँको बजेट पारित गरेको छ। मंगलवार भएकाे १६औं नगरसभामा नगर उपप्रमुख अनिता चौधरीले प्रस्तुत गर्नुभएको हाे ।
बजेटअनुसार कुल विनियोजनमध्ये ७२.१५ प्रतिशत अर्थात् ७४ करोड ६६ लाख १६ हजार रुपैयाँ चालु खर्चतर्फ र २७.८५ प्रतिशत अर्थात् २८ करोड ८० लाख ८४ हजार रुपैयाँ पुँजीगत खर्चतर्फ छुट्याइएको छ।
नगरपालिकाले विगतका अधुरा योजना सम्पन्न गर्न ६ करोड ५० लाख रुपैयाँ दायित्वतर्फ विनियोजन गरेको छ। शिक्षाको गुणस्तर सुधारलाई प्राथमिकता दिँदै ४ करोड २५ लाख रुपैयाँ शिक्षा क्षेत्रमा छुट्याइएको छ। स्वास्थ्य सेवामा पहुँच विस्तारका लागि २ करोड १७ लाख, नगर खेलकुदको प्रवर्द्धनका लागि २५ लाख, कृषि उत्पादन वृद्धिका लागि ४५ लाख, र पशुपालन तथा पशुधन व्यवस्थापनका लागि पनि ४५ लाख रुपैयाँ विनियोजन गरिएको छ।
यसका अतिरिक्त गौशाला व्यवस्थापनका लागि १७ लाख, लक्षित वर्गका माग सम्बोधनका लागि २७ लाख, दलित लक्षित आयआर्जनका लागि ३ लाख, लागुपदार्थ न्यूनीकरण र जनचेतनाका लागि ३ लाख ५० हजार, तथा मानव–वन्यजन्तु द्वन्द्व न्यूनीकरणका लागि ८ लाख रुपैयाँ छुट्याइएको छ।
नगरसभामा आगामी वर्षको बजेट कार्यान्वयनका लागि सार्वजनिक खर्चमा मितव्ययीता अपनाउने, आन्तरिक नियन्त्रण प्रणाली लागू गर्ने, नवप्रवर्तनमार्फत उद्यमशीलता विकासमा जोड दिने, आन्तरिक स्रोत परिचालन र कर प्रणाली सुधार गर्ने तथा संघीय र प्रादेशिक सरकारमाथिको निर्भरता घटाउने रणनीति प्रस्तुत गरिएको छ।
त्यसैगरी, बजेट कार्यसम्पादनलाई प्रभावकारी बनाउने, अनुगमन र मूल्याङ्कन सशक्त बनाउने, तथा आम नागरिकलाई बजेट तथा विकास कार्यमा सहभागी गराउनेजस्ता उपायहरू पनि तय गरिएको नगरसभाले जनाएको छ।
नगर प्रवक्ता मेकबहादुर गुरुङका अनुसार नगरसभा शान्तिपूर्ण र सौहार्दपूर्ण वातावरणमा भएको हो। सभाबाट दलितसम्बन्धी र वनसम्बन्धी विधेयक पनि पारित गरिएको छ।
१६औं नगरसभा नगरप्रमुख तेजबहादुर भाटको अध्यक्षतामा भएको हो, जसमा जनप्रतिनिधिहरू, वडा अध्यक्षहरू, कर्मचारी तथा सञ्चारकर्मीहरूको उपस्थिति रहेको थियो।
