होमेन्द्र थापा, बर्दिया
जेठ १ गते
स्थानीय तहमा स्वास्थ्य सेवाको पहुँच विस्तार गर्दै रक्त अभाव न्यूनीकरण गर्ने उद्देश्यले सञ्चालन गरिएका कार्यक्रम प्रभावकारी बन्दै गएका छन् । बर्दियाको गेरुवा गाउँपालिका मा आयोजित निःशुल्क स्वास्थ्य तथा रक्तदान कार्यक्रममा स्थानीयवासीको उत्साहजनक सहभागिता देखिएको छ ।
“रक्तदान नै जीवनदान हो” भन्ने सन्देशसहित आयोजित कार्यक्रममा पछिल्लो समय “रगत दिएर शरीर कमजोर हुन्छ” भन्ने गलत सोच क्रमशः हट्दै गएको देखिएको छ । गगन सिंह कुँवर फाउन्डेसन नेपाल को आयोजनामा सम्पन्न कार्यक्रममा दुई महिला सहित ५६ जनाले रक्तदान गरेका छन् ।
कार्यक्रमअन्तर्गत सञ्चालन गरिएको निःशुल्क आँखा परीक्षण शिविरमा २ सय ३२ जनाले सेवा लिएका थिए । तीमध्ये १४८ महिला र ८४ पुरुष रहेका थिए । परीक्षणका क्रममा २७ जनामा मोतिबिन्दुको समस्या देखिएको आयोजकले जनाएको छ । ती बिरामीहरूको आगामी शनिबार शिवगंगा आँखा अस्पताल मा निःशुल्क शल्यक्रिया गरिने फाउन्डेसनका अध्यक्ष शेरबहादुर कुँवरले जानकारी दिनुभयो ।
फाउन्डेसनले एक वर्ष नपुग्दै तीन पटक रक्तदान शिविर सञ्चालन गरिसकेको छ । जसमा दुइ सय बढीले रक्तदान गरेका छन । जिल्लाको पिछडिएको क्षेत्रमा अस्पतालको अभाव, आँखासम्बन्धी समस्या तथा अस्पतालहरूमा देखिएको रगत अभावलाई मध्यनजर गर्दै कार्यक्रम आयोजना गरिएको अध्यक्ष कुँवरले बताउनुभयो ।
स्थानीय बालकुमारी सिंहले गाउँमै स्वास्थ्य सेवा पाउँदा खुशी लागेको बताउँदै आगामी दिनमा पनि यस्ता कार्यक्रम निरन्तर सञ्चालन हुनुपर्ने धारणा राख्नुभयो । कार्यक्रममा सहभागी सुरेश दहितले आफूले सातौँ पटक रक्तदान गरेको बताउँदै स्वस्थ व्यक्तिले रक्तदान गर्दा शरीरमा कुनै असर नपर्ने भएकाले सबैलाई रक्तदान गर्न आग्रह गर्नुभयो ।
स्थानीय स्तरमै सञ्चालन गरिएका यस्ता कार्यक्रमले स्वास्थ्य सेवाको पहुँच विस्तार हुनुका साथै सामाजिक चेतना अभिवृद्धिमा समेत टेवा पुगेको स्थानीयवासीको भनाइ छ ।
