बारबर्दिया,
बारबर्दिया नगरपालिका–८ स्थित जनज्योति आधारभूत विद्यालयलाई तीन तारे विद्यालय घोषणा गरिएको छ। लुम्बिनी प्रदेश सभा सदस्य राजकुमार थारुले एक विशेष कार्यक्रममा विद्यालयलाई तीन तारे विद्यालयको रूपमा घोषणा गर्नुभएको हो।
विद्यालयले खानेपानी, सरसफाइ तथा स्वच्छताका १० वटा सूचकहरू पूरा गरी सरसफाइसम्बन्धी व्यवहारमा सकारात्मक परिवर्तन ल्याएपछि तीन तारा प्राप्त गर्न सफल भएको हो।
कार्यक्रमका प्रमुख अतिथि समेत रहनुभएका प्रदेश सांसद थारुले शिक्षक, विद्यार्थी र अभिभावकहरूको मेहनत तथा लगनशीलताका कारण विद्यालयले यो उपलब्धि हासिल गर्न सफल भएको बताउनुभयो। साथै, उहाँले विद्यालयको विकासका लागि प्रदेश सरकारबाट आवश्यक सहयोग गर्ने प्रतिबद्धता पनि जनाउनुभयो।
विशिष्ट अतिथिका रूपमा कार्यक्रममा सहभागी हुनुभएकी बारबर्दिया नगरपालिकाकी उपप्रमुख रत्नकुमारी पाण्डेले विद्यालयले तीन तारे स्तर कायम राख्न निरन्तर सरसफाइलाई प्राथमिकता दिनुपर्नेमा जोड दिनुभयो। साथै, बारबर्दिया नगरपालिकामा यो उपलब्धि हासिल गर्ने दोस्रो विद्यालय बनेकोमा विद्यालय परिवार र सरोकारवालाहरूलाई धन्यवाद ज्ञापन गर्नुभयो।
विद्यालयले तीन तारा प्राप्त गर्न निम्न सूचकहरू पूरा गरेको छ:
- स्वच्छ खानेपानीको व्यवस्था
- सफा र व्यवस्थित शौचालय
- हरियालीयुक्त स्वच्छ वातावरण
- व्यक्तिगत सरसफाइ
- समुचित सरसफाइ सुविधा
- सरसफाइ शिक्षा
- महिनावारी स्वच्छता व्यवस्थापन
- संस्थागत व्यवस्थापन र दिगोपन
- विपद् जोखिम व्यवस्थापन
- अनुगमन तथा जवाफदेहिता
कार्यक्रममा विभिन्न वक्ताहरूले विद्यालयमा सरसफाइको स्थायित्वलाई सुनिश्चित गर्नुपर्नेमा जोड दिनुका साथै शिक्षाको गुणस्तर सुधार गर्ने आवश्यकता औंल्याएका थिए।
बारबर्दिया नगरपालिका, युके एड, वाटर एडको सहयोगमा बेस बर्दिया, राष्ट्रिय अपाङ्ग महासंघ, र नेपाल प्रजनन स्याहार केन्द्रको संयुक्त प्रयासमा विद्यालयलाई तीन तारे विद्यालयको रूपमा घोषणा गरिएको हो।
