होमेन्द्र थापा, बर्दिया
लुम्बिनी प्रदेशका सामाजिक विकास मन्त्री जन्मजय तिमिल्सेनाले बर्दिया जिल्लालाई शिक्षा क्षेत्रमा अघिल्लो वर्षको तुलनामा एक अरबभन्दा बढी बजेट विनियोजन भएको बताउनुभएको छ ।
बढैयाताल गाउँपालिका–८, कण्ठपुरमा रहेको विद्याज्योति नमुना माध्यमिक विद्यालयको स्वर्ण महोत्सव वर्ष २०८१/0८२ को मूल समारोहलाई सम्बोधन गर्दै मन्त्री तिमिल्सेनाले शिक्षा क्षेत्रलाई पहिलो प्राथमिकतामा राख्नुपर्ने धारणा व्यक्त गर्नुभयो ।
मन्त्री तिमिल्सेनाले शिक्षा क्षेत्रमा पर्याप्त लगानी भए मात्र समाजमा सकारात्मक रूपान्तरण सम्भव हुने उल्लेख गर्दै समाज सुधार, समृद्धि र विकास सबैको साझा गन्तव्य भएको बताउनुभयो । साथै, स्वास्थ्य र शिक्षाजस्ता संवेदनशील क्षेत्रमा सबैको सोच र धारणा एउटै हुनुपर्नेमा उहाँले जोड दिनुभयो ।
स्वर्ण महोत्सवको अवसरमा विद्यालयले आह्वान गरेको अक्षयकोष स्थापना अभियानअन्तर्गत ४१ जना दाताबाट ५७ लाख ७७ हजार ५ सय ८७ रुपैयाँ संकलन भएको विद्यालयका प्रधानाध्यापक भक्तिसागर रेग्मीले जानकारी दिनुभयो ।
प्रधानाध्यापक रेग्मीका अनुसार विद्यालयको भौतिक तथा आर्थिक सुधारका लागि गरिएको आह्वानलाई दाताहरूले सहर्ष स्वीकार गरेका हुन् । यसैगरी, स्वर्ण जयन्ती कार्यक्रम सञ्चालनका लागि थप १ सय ६ जना सहयोगदाताबाट १७ लाख ९६ हजार १७ रुपैयाँभन्दा बढी सहयोग रकम संकलन भएको छ ।
अक्षयकोष स्थापनाका लागि सबैभन्दा बढी सहयोग विद्यालयमै कार्यरत शिक्षक तथा कर्मचारी परिवारबाट प्राप्त भएको विद्यालय प्रशासनले जनाएको छ ।
