ठाकुरबाबा
ठाकुरबाबा नगरपालिकाका युवाहरुलाई योजना तर्जुमा प्रक्रियामा युवाको सहभागीताको बारेमा अभिमूखिकरण गरिएको छ । आर्थिक बर्ष २०८१/०८२का लागि नीति कार्यक्रम तथा बजेट तर्जुमा गर्ने समय नजिकीदै गर्दा युवाहरुलाई पालिका स्तरीय अभिमुखिकरण गरिएको हो ।
युवाहरुको सभाद्धारा युवाहरुको आवाज तथा मुद्दा उजागरी साझा मुद्दाहरु तय गर्न, युवाहरुको सहभागिता सुनिश्चितका लागि योजना तयारी गर्न र योजना तर्जुमा प्रक्रियामा युवाहरुको सहभागिता सुनिश्चितताका लागि पैरवी गर्ने उदेश्यले कार्यक्रमको आयोजना गरिएको छ ।
शिक्षा क्षेत्र, यौन तथा प्रजनन् स्वास्थ्य अधिकार, युवा तथा बाल संरक्षण, खानेपानी तथा सरससफाई सवाल तथा मुद्दाहरु उजागर गरी समाधानका उपायहरुको बिषयमा युवाहरुलाई समुहमा रुपमा छलफल गराईको छ । शिक्षालाई पुर्ण रुपमा निशुल्क, समयानुसारको प्रविधिक शिक्षा हुनु पर्ने, विद्यालय बालमैत्री किशोरकिशोरी मैत्री बनाउनु पर्ने, खानेपानी सरसफाईका कार्यक्रमलाई निरन्तरता दिनु पर्ने लगाएतका सवालहरु छलफल गरिएको छ । उक्त छलफलको बिषयलाई लिएर योजना तर्जुमा प्रक्रियामा समाबेश गर्नका लागि स्थानीय जनप्रतिनिधि तथा सरोकारवालाहरुसंग अन्तरक्रिया गर्नु पर्ने कार्यक्रम रहेको छ ।
ठाकुरबाबा नगरपालिका महिला बालबालिका तथा जेष्ठ नागरिक शाखाकी प्रमुख गोगनसरा आर्चायले युवाहरुलाई आफ्नो सवालहरु नगरपालिकालाई टिपोट वा बिषयगत शाखालाई भेटेर पनि सल्लाह सुझाब दिनका लागि आग्रह गर्नु भएको छ । अहिले पालिकाको बार्षिक नीति तथा कार्यक्रम बनाउने समय भएकोले युवाहरुले दिएको सल्लाह सुझाब महत्वपुर्ण हुने बताउनु भएको छ ।
प्लान इन्टरनेशनल नेपाल र राधाकृष्ण थारु जनसेवा केन्द्रको साझेदारीमा संरचना बालिका सशक्त परियोजना अन्तरगत ठाकुरबाबा नगरपालिकामा युवाहरुलाई अभिमुखिकरण गरिएको छ । अभिमुखिकरणमा राष्ट्रिय युवा नीति तथा राष्ट्रिय युवा परिषद्को बारेमा परियोजनाका अनुगमन, मुल्याँकन अधिकृत जनक थापाले जानकारी गराउनु भएको छ । नेपालको सविधानमा युवाको परिभाषा र युवाहरुको अवस्थाको बारेमा परियोजनाका कार्यक्रम अधिकृत संजय चौधरीले सहजिकरण गर्नु भएको छ । कार्यक्रममा ठाकुरबाबाका युवा, नागरिक समाज, सञ्चारकर्मीहरु गरी करिब ३० जनाको सहभागिता रहेको थियो । कार्यक्रम ठाकुरबाबा नगरिक समाज संजालका संयोजक ओमप्रकाश बिष्टको अध्यक्षतामा भएको छ ।
