बर्दिया — बर्दिया जिल्लाको बारबर्दिया नगरपालिकाले १७औं नगरसभा मार्फत आगामी वर्षका लागि नीति तथा कार्यक्रम सार्वजनिक गरेको छ। पालिकाले समावेशी विकास, पूर्वाधार सुदृढीकरण, शिक्षा, सूचना प्रविधि, कृषि, ऊर्जा र सामाजिक सुरक्षालाई प्राथमिकता दिएको छ।
पालिकाभित्रका ११ वटै वडामा रहेका काठेपुलहरू विस्थापित गरी नयाँ संरचना बनाइनेछ भने सडक चौडाइ ६ मिटरभन्दा कम भएका बाटोमा अब लगानी नगर्ने नीतिको घोषणा गरिएको छ।
सूचना प्रविधिको पहुँच बढाउँदै सबै बस्तीमा इन्टरनेट सेवा विस्तार गर्ने र मुख्य बजार क्षेत्रहरूमा निःशुल्क वाईफाईको व्यवस्था गरिने छ। त्यस्तै, प्रयाप्त भोल्टेजसहित विद्युत सेवा हरेक बस्तीमा विस्तार गरिनेछ।
शिक्षा क्षेत्रमा नवप्रवर्तन कार्यक्रम संचालनका लागि प्रस्तावनाको आधारमा अनुदान प्रदान गरिने र सुत्केरी बिदामा बसेका शिक्षकहरूका लागि सत्ता शिक्षकको व्यवस्था गरिने नीति लिइएको छ।
खेलकुदतर्फ पेनकेक सिलाट, कराते, भारोत्तोलन, उस्सुजस्ता खेलहरूलाई व्यवस्थित रूपमा सञ्चालन गरिने छ।
८० वर्षभन्दा माथिका जेष्ठ नागरिक, अपांगता भएका व्यक्ति र सुत्केरी महिलालाई घरमै गएर गुणस्तरीय सेवा प्रदान गरिने योजना अघि सारिएको छ।
कृषि क्षेत्रमा आलु, प्याज लगायतका बालीका लागि चिस्यान केन्द्र निर्माण गरिने र रैथाने बाली संरक्षण तथा प्रवर्धन गरिने छ। कृषकहरूलाई घरदैलोमै मौसमसम्बन्धी सूचना दिन सूचना प्रणाली विकास गरिनेछ।
दूध संकलन तथा प्रशोधन केन्द्र स्थापना र सहकारी सदस्यहरूलाई उत्पादन तथा बजारसँग जोड्ने कार्यक्रमसमेत नीति कार्यक्रममा समावेश छ।
शिक्षा र स्वास्थ्यसँगै समावेशी तथा वातावरणमैत्री शौचालय र सुरक्षित, पहुँचयोग्य खानेपानीको व्यवस्था नगरपालिकाभित्रका सबै विद्यालयहरूमा गरिने छ।
सार्वजनिक जग्गाहरूको लगत संकलन तथा संरक्षण गरिनेछ भने स्थानीय आपतकालीन कार्य सञ्चालन केन्द्रलाई थप व्यवस्थित गरी २४ सै घण्टा सञ्चालन गरिने योजना अघि सारिएको छ।
