ठाकुरबाबा नगरपालिकाले आफ्नो आठौं स्थापना दिवसको अवसरमा द्वन्द्व पीडित समिति (सिभिसि) बर्दियालाई सम्मान गरेको छ। २०८१ फागुन २७ गते आयोजित कार्यक्रममा सिभिसि बर्दियाका अध्यक्ष भागीराम चौधरीलाई कदरपत्रसहित दोसल्ला ओढाएर सम्मान गरिएको हो। द्वन्द्व पीडित अभिलेख, सवाल पहिचान तथा सम्बोधनका लागि ठाकुरबाबा नगरपालिकाले अघि सारेको योजनाबद्ध कार्यलाई सफल बनाउन महत्वपूर्ण योगदान पु¥याएको भन्दै उक्त सम्मान प्रदान गरिएको हो।
ठाकुरबाबा नगरपालिकाले महिला शान्ति तथा सुरक्षा सम्बन्धी संयुक्त राष्ट्रसंघ सुरक्षा परिषद्को प्रस्ताव न. १३२५ र १८२० कार्यान्वयन गर्दै देशकै पहिलो नमुना नगरपालिका बन्न सफल भएको छ। द्वन्द्व पीडितहरूसँग सम्बन्धित विभिन्न मुद्दा पहिचान गरी नीतिगत निर्णयमार्फत योजनाबद्ध रूपमा सम्बोधन गर्ने कार्यलाई प्राथमिकता दिँदै आएको छ। यस क्रममा सिभिसि बर्दियाले नगरपालिकासँग सहकार्य गर्दै प्राविधिक सहयोग समेत प्रदान गर्दै आएको छ।
नगरपालिकाले द्वन्द्व पीडितहरू तथा नागरिकहरूको मानसिक स्वास्थ्य क्षेत्रमा सहयोग पुर्याउँदै आएको सिएमसि नेपाललाई समेत सम्मान गरेको छ। कार्यक्रममा सिएमसि नेपालका लुम्बिनी प्रदेश संयोजक हिमाल गैरेलाई सम्मानपत्र र दोसल्ला प्रदान गरिएको थियो। सो अवसरमा नगरपालिकाको समग्र विकास र समृद्धिमा योगदान पुर्याएका विभिन्न व्यक्तित्व, कर्मचारी तथा संघ–संस्थालाई समेत सम्मान गरिएको थियो।
