मोरङ । युद्धग्रस्त देश इजरायलमा उद्धारको पर्खाइमा रहेका २ सय ५३ जना नेपालीलाई लिएर नेपाल वायुसेवा निगमको जहाज नेपालतर्फ उडेको छ । इजरायलस्थित तेल अभिभ विमानस्थलबाट उडेको जहाज आजै राति नेपाल आइपुग्नेछ । परराष्ट्र मन्त्री एनपी साउद स्वयम् नेपाली विद्यार्थी लिन इजरायल पुग्नु भएको थियो ।
मन्त्री साउदको सचिवालयले दिएको जानकारीअनुसार २ सय ५३ जना नेपाली नागरिकलाई लिएर नेपाल वायु सेवा निगमको जहाज नेपालका लागि उडेको हो । आज राति १ः३० बजे जहाज काठमाडौंस्थित त्रिभुवन अन्तर्राष्ट्रिय विमानस्थलमा अवतरण गर्ने बताइएको छ ।
इजरायलमा चार हजार पाँच सय जना नेपाली कामदार (केयर गिभर) छन् । उनीहरू हालसम्म सुरक्षित छन् । दुई सय ६५ जना नेपाली विद्यार्थीमध्ये हमासको आक्रमणबाट गत शनिबार १० जना विद्यार्थीको मृत्यु भएको थियो । केही घाइते भएर उतै उपचाररत छन् भने एकजना वेपत्ता छन् ।
हमासले आक्रमण गरेको इजराइलको गाजा आसपासको क्षेत्रमा समस्या भएपनि अन्य क्षेत्रमा भने हालसम्म अवस्था शान्त नै रहेको छ ।
