सुन्दरहरैचा । युवा पुस्तालाई संविधान, नियम कानून तथा संसदीय अभ्यास सिकाउने उद्देश्यका साथ मोरङको सुन्दरहरैंचा नगरपालिकामा मंगलबारदेखि नमुना युवा नगरसभा सुरु भएको छ । जिल्ला युवा समिति मोरङ र सुन्दरहरैँचा नगरपालिकाको संयुक्त आयोजनामा चार दिने नमुना युवा नगरसभा सुरु भएको छ । स्थानीय त्रिवेणी रिर्सोटमा सुरु भएको कार्यक्रमको कोशी प्रदेशसभाका उपसभामुख सृजना दनुवारले उद्घाटन गर्नुभयो । सहभागीहरुलाई चार दिनसम्म नगरसभाबाट कानुन निमार्ण, नगरसभाको संसदीय अभ्यास र यसका प्रकृयाहरु, स्थानिय तहमा बजेट निर्माणका प्रकृयाहरु र स्थानिय सरकारमा युवाहरुको अर्थपूर्ण सहभागीताका बारेमा प्रशिक्षण हुने प्रशिक्षक सरोज ढकालले जानकारी दिनुभयो ।
नमुना युवा नगर सभा जिल्ला युवा समितिको समन्वयमा गत वर्षदेखि सुन्दरहरैंचामा आयोजना गर्न थालिएको कार्यक्रमले युवालाई देशको संविधान नियम कानून, संसदीय व्यवस्था र अनुशासन सिकाइ भविष्यमा देशको नेतृत्व गर्न सक्षम जनशक्ति उत्पादन गर्नका लागि प्रेरित गर्ने अपेक्षा लिइएको जिल्ला युवा समिति मोरङका अध्यक्ष सन्तोष घिमिरेले जानकारी दिनुभयो ।
उहाँले युवालाई नगरसभाको निर्णय प्रकृयाको ज्ञान दिई असल संस्कार र सुझबुझपूर्ण व्यवहार सिकाउन पनि नमुना नगर युवा सभा कार्यक्रम गरिएको र यसबाट युवालाई नेतृत्व विकास गर्न सहयोग पुग्ने बताउनुभयो । कार्यक्रममा नगरपालिकाको नगरसभा सञ्चालन गरे जस्तै गरि युवाहरुले अभ्यास गर्ने गर्दछन् । जसका लागि स्थानीय तहका वडामा वडा कार्यालय जस्तै गरि वडास्तरीय युवा क्लब गठन गरिएको छ । नमुना नगरसभामा पालिकाका १२ वटा वडाबाट ४५ जना युवा सहभागी छन् ।
